Fýtbol: «Tobyl» birneshe oıynshymen tolyqty
QOSTANAI. QazAqparat - Qysqy aýys-túıis kezinde «Tobyl» fýtbol klýby birneshe oıynshymen tolyqty, dep habarlaıdy QazAqparat tilshisi.
«Tobyl» fýtbol klýbynyń resmı saıtynda kórsetilgendeı, basshylyq 2017 jylǵy quramnyń 80%-yn saqtap qaldy. Klýb dırektory Nıkolaı Panınniń aıtýynsha, aıaq-dop sheberleri jańadan taǵaıyndalǵan bas bapker Vladımır Nıkıtenkonyń kelisimimen alynady. Sondaı-aq, áli 5-6 fýtbolshy qatarǵa qosylady.
«Biz Djaba Kankava, Maksım Fedın, Aslan Darabaev, Jalǵas Ábilǵazy esimdi fýtbolshylarmen kelisimshartqa otyrdyq. Maýsym aıaqtalysymen Mark Gýrman, Raýl Djalılov, Evgenıı Levın, Amır Bekıch komandadan ketti. Buǵan qosa «Tobyl» kapıtany Almır Mýhýtdınov ta basqa klýbta óner kórsetetin bolyp sheshildi. «Astanadan» jalǵa alynǵan Jalmukan men Lýllaký komandalaryna qaıta oraldy», - dedi Panın.
Jańa kelgen fýtbolshylardyń ishinen Djaba Kankavany atap ótý kerek. 31 jastaǵy oıynshy "Dınamo", "Alanııa", "Dnepr", "Krıvbass" sııaqty tanymal klýbtardyń sapynda oınaǵan. Al, "Tobylǵa" deıin Frantsııanyń "Reıms" komandasynda dop tepti. Sondaı-aq, ol jankúıerlerge óziniń erligimen de belgili. 2014 jyly Ýkraına birinshiliginde qatty soqqydan esinen aıyrylyp, tilin jutyp qoıǵan kıevtik "Dınamo" kapıtany Oleg Gýsevtiń janyn aman alyp qalǵan edi. Bul erligi úshin Kankavaǵa Ýkraınanyń Memlekettik Tótenshe jaǵdaılar qyzmetiniń qurmet gramotasy tapsyryldy.
