Fýtbol: «Tobyl» birinshilikti jeńispen bastady
NUR-SULTAN. QazAqparat - Búgin fýtboldan Premer-lıga komandalary arasyndaǵy Qazaqstan birinshiliginiń alǵashqy týryndaǵy taǵy úsh oıyn ótti, dep habarlaıdy QazAqparat tilshisi.
Búgingi birinshi kezdesý Aqtaýda jergilikti «Kaspıı» men «Aqtóbe» komandalary arasynda boldy. Oıyn barysynda alań ıeleri qatarynan Ýadjı Salıdiń soqqan dobyna aqtóbelik klýbtan Maksım Fedın bir golmen jaýap qaıyrdy. Oıyn 1:1 esebimen aıaqtaldy.
Qyzylordada jergilikti «Qaısar» men «Taraz» komandalary sheberlik baıqasty. Birinshi kezeńde qos klýb bes gol soǵyp úlgerdi. Aldymen tarazdyq qorǵaýshy Eldos Ahmetov óz qaqpasyna dop engizip alsa, 22-mınýtta qyzylordalyq Maqsat Baıjanov esepti ústemeleı tústi. Budan keıin «Taraz» sapynan Abzal Taýbaı 25, Abylaıhan Jumabek 36, Baýyrjan Baıtana 45-mınýttarda mergendik tanytyp, óz komandasyn alǵa shyǵardy. Oıynda «Qaısar» qarsylasyna 2:3 esebimen ese jiberdi.
Qostanaıda «Tobyl» men Oraldyń «Aqjaıyq» klýbtary ózara kúsh synasty. Alǵashqy kezeńde 30-mınýtta qostanaılyq klýb sapynan Azat Nurǵalıev kózdegen nysanadan múlt ketken joq. Al 75-mınýtta onyń áriptesi Ashat Taǵybergen gol soǵyp, qorytyndy esepti belgiledi. «Tobyl» 2:0 esebimen jeńiske jetti.
Al Shymkentte ótkizýi belgilengen «Ordabasy» men Petropavldyń «Qyzyljar» komandalary arasyndaǵy oıyn aýa raıynyń qolaısyzdyǵynan keıinge qaldyryldy. Bul kezdesýdiń qashan ótetini jóninde qosymsha sheshim qabyldanady.
Aıta keteıik, 13 naýryzda alǵashqy týrdaǵy úsh oıyn ótti. Óz alańynda «Qaırat» Taldyqorǵannyń «Jetisýyn» 2:1 esebimen tize búktirse, «Atyraý» Qaraǵandynyń «Shahterinen» 0:1 esebimen jeńilip qaldy. Al Túrkistanda jergilikti «Turan» men elordalyq «Astana» 2:2 esebimen teń tústi.
Aldaǵy týr oıyndary 19 jáne 20 naýryz kúnderi ótkiziledi.
