Fýtbol: «Tobyl» bapkerler quramyn tanystyrdy
QOSTANAI. QazAqparat - Búgin Qostanaıdyń "Tobyly" qysqy oqý-jattyǵý jıyndaryn bastady, dep habarlaıdy QazAqparat klýbtyń resmı saıtyna silteme jasap.
Qostanaılyqtar oqý-jattyǵý jıyndaryn Túrkııanyń Miracle meımanhanasynyń bazasynda 6-21 qańtar aralyǵynda ótkizedi
Aldyn-ala boljam boıynsha, eki joldastyq kezdesý uıymdastyrylýy múmkin. Oıyndar tısinshe, 16 jáne 20 qańtarǵa belgilengen. OJJ kezinde qarsylastar anyqtalady. Negizgi quramǵa "Tobyldyń" jastary da kelip qosyldy.
Jıynnyń birinshi kúni klýb dırektory Nıkolaı Panın fýtbolshylarǵa bas bapker Vladımır Gazzaevty tanystyrdy. Sondaı-aq, bas bapkerdiń kómekshisi Nıkolaı Latysh, sport dırektory Nurbol Jumasqalıev, tehnıkalyq dırektor Vladımır Nıdergaýs jańa qyzmetterine kiristi. Óz kezeginde bas bapker Vladımır Gazzaev naqty tapsyrmalarmen jumys isteıtinin aıtty.
«Bárińizdi 2018 jyldyń sátti aıaqtalýymen, jańa jylmen quttyqtaımyn. Aldaǵy ýaqytta jekeleı de, komandamen de arnaıy josparlar jasamaqpyz. "Tobylda" jaqsy oıynshylar jıylǵan. Quramdy kúsheıtýge de múmkindik bar. Oblys jáne klýb basshylyǵy júktegen mindetti oryndaýǵa bolady. Erteń oıynshylarmen jekeleı kezdesip, jumys barysyn talqylaımyz», - dedi bas bapker.
Jıyn sońynda komanda jattyǵý jumystaryna kiristi.
