Fýtbol: Tarazdyq 17 jasar oıynshy premer-lıgadaǵy alǵashqy golyn soqty
ASTANA. QazAqparat - Fýtboldan premer-lıga komandalary arasynda 16-týrdyń nátıjeleri tolyq belgili boldy, dep habarlaıdy «QazAqparat» tilshisi.
Oraldyń «Aqjaıyǵy» syrt alańda Kókshetaýdyń «Oqjetpesimen» kezdesti. Astanadaǵy «Tarlan Arena» stadıonynda ótken kezdesýdiń birinshi taımynda qazirgi kezde Vıktor Pasýlko jattyqtyratyn alań ıeleri óz múmkindikterin qur jibergen joq. 27-mınýtta Aleksandr Marochkın baspen qaqpa buryshyn dál kózdese, 36-mınýtta reseılik legıoner Aleksandr Kozlov ábjildik tanytty. Bul eki sátte de Tımýr Dosmaǵambetov buryshtamadan dopty dál bere bildi.
Ekinshi taım «Aqjaıyq» oıynshylarynyń basymdyǵymen ótti. 57-mınýtta aıyp alańynda dop «Oqjetpes» qorǵaýshysynyń qolyna tıip, 11 metrlik penaltı belgilendi. Ony nıgerııalyq Izý Azýka dál oryndap, esepti qysqartty. Budan keıin de Vahıd Masýdov shákirtteriniń tarazy basyn teńestiretin múmkindikteri boldy. Tipti «Oqjetpestiń» qorǵaýshysy Oleg Nedashkovskıı ekinshi eskertý alyp, alańnan qýyldy. Biraq kókshelikter 2:1 esebin saqtap qala aldy.
«Mundaı ystyqta oınaý qıynǵa soqty. Ókinishke qaraı, uzyn boıly birneshe oıynshymyz bolsa da, biz standartty jaǵdaıda eki gol ótkizip aldyq. Men Marochkın gol soqqan kezde tártip buzyldy dep esepteımin, ol Govedarıtsaǵa asylyp turyp, dopty qaqpaǵa baǵyttady. Ekinshi taımda komanda tezirek qımyldap, jaqsy oınady. Esepti teńestirýge sál sáttilik jetispedi», dedi matchtan soń V.Masýdov.
Sóıtip birinshilik barysynda bes ret qatarynan jeńilgen «Aqjaıyq» týrnır kestesinde onynshy orynǵa syrǵydy. 25 maýsym kúni oraldyqtar «Taraz» komandasyn qabyldaıdy. Bul týrda tarazdyqtar kútpegen jerden birinshilik kóshbasshylarynyń biri Pavlodardyń «Ertisin» 2:0 esebimen jeńip ketti. Osy oıynda 17 jasar tarazdyq talant Erkebulan Seıdahmet áýeli birinshi goldyń avtory Baqtııar Zaınýtdınovke dál pas berse, keıin ózi qaqpaǵa jekedara shyǵyp, premer-lıgadaǵy alǵashqy dobyn soqty.
Aqtóbede jergilikti komandany 4:2 esebimen jerge qaratqan «Astana» 39 upaımen burynǵysha kósh bastap keledi. Óz alańynda Qostanaıdyń «Tobylyn» 2:0 esebimen utqan Almatynyń «Qaıraty» (37 upaı) ekinshi, Qyzylordada «Qaısardy» 1:0 esebimen tize búktirgen «Ordabasy» (Shymkent) 35 upaımen úshinshi orynda tur. Medal úshin talas ózgelerden birshama qara úzip ketken osy úsh komandanyń arasynda ótetin syńaıly. Óıtkeni tórtinshi satydaǵy «Ertistiń» nebári 28 upaıy bar.
Aıta keteıik, qazirgi kezde premer-lıga komandalary óz qataryn nyǵaıtýǵa múmkindik aldy. «Aqjaıyq» quramynda da ózgeris bar. Komandadan Oral fýtbolynyń taǵy bir túlegi Baýyrjan Omarov pen Edýard Sergıenko basqa klýbtarǵa ketti.
