Fýtbol: Samat Symaqov «Rızespor» sapynda oınaıdy
ASTANA. 5 qańtar. QazAqparat - Ulttyq quramamyzdyń birneshe jyldan bergi kapıtany, ári qorǵaýshysy bolyp kelgen Samat Symaqov medıtsınalyq tekserýden soń Túrkııanyń «Rızespor» komandasymen 1,5 jyldyq kelisimge otyrdy. «Alaman» sport agenttiginiń jazýynsha, bul aqpardy túrkııalyq klýbtyń basshysy Mustafa Denızlı rastady.
34 jasar fýtbolshynyń Qazaqstan quramasynda júrip 59 oıyn ótkizgeni anyq. Al ol sporttaǵy ómirinde búginge deıin 428 kezdesýge qatysyp, 55 gol soqqan eken.
Qazaqstandyq birneshe klýbta oınaǵan Samat Reseı jasyl alańdarynda da ter tókken bolatyn. Sondaı-aq oǵan «Krylıa Sovetov», «Krasnodar», «Makkabı», «Vadýts» syndy shet eldik klýbtardan usynys túsken edi. Tipti nemis býndeslıgasynda oınaıtyn komandalar Samatqa qyzyǵýshylyq tanytqan bolatyn. Alaıda fýtbolshynyń ózi «Aqtóbege» adal bolyp qaldy.
Túrkııadaǵy eń joǵarǵy lıga «Sýper-lıga» bolsa, odan keıingisi «2-nshi dıvızıon A» degen atpen tanymal. Al úshinshisi «2-nshi dıvızıon B» dep atalady. Samattyń jańa klýby «2-nshi dıvızıon A» kestesiniń 5-inshi satysynda kele jatyr. Alǵashqy eki úzdik komanda «Sýper-Lıgaǵa» tikeleı joldama alsa, keıingi 4 komanda pleı-off kezeńine shyǵady.
«Rızespor» komandasynda ulttyq quramamyzdyń burynǵy oıynshysy Davıd Lorııanyń da oınaıtynyn esterińizge salamyz.
