FÝTBOL: «Rýbın» (Reseı) - «Qaırat» (Almaty) 1:2
ALMATY. QazAqparat- Almatynyń «Qaırat» fýtbol komandasy ótken senbi kúni syrt alańda bolǵan joldastyq kezdesýde Qazannyń (Tatarstan) «Rýbın» komandasyn 1:2 esebimen tize búktirdi.
Alǵashqy goldy oıynnyń 56-shy mınýtynda «Qaırat» komandasynyń jartylaı qorǵaýshysy Záýirbek Plıev saldy. Sol qaptaldan aıyp alańyna engen ol, jaqyn buryshty dál nysanaǵa alyp, dopty torda týlatty. Kóp uzamaı oıynnyń 62 mınýtynda «Rýbın» oıynshysy Býrlak sol qaptaldan áýeletip berilgen dopty qaqpaǵa dál baǵyttap, esepti teńestirip ketti. Degenmen, oıynnyń 69-shy mınýtynda jartylaı qorǵaýshy Mıhaıl Bakaevtyń oń qanattan aıyp alańynyń syrtynan tepken tamasha doby «Rýbınniń» qaqpashysyn qapy qaldyrdy. Ol «toǵyzdyqtan» engen dopqa tek moınyn buryp qana úlgerdi.
Bul oıynǵa «Rýbın» qosalqy quramymen shyqty, degenmen «Qaırat» komandasynyń da negizgi quramynyń 8 oıynshysy ulttyq quramanyń sapynda óner kórsetýge ketken bolatyn.
sovsport.ru saıtyna bergen suhbatynda «Qaırat komandasynyń bas jattyqtyrýshysy Vladımır Vaıss:
«Bul jeńis jigitterdiń ózderine degen senimdiligin arttyra túsedi degen úmittemin. Oıyn qyzyqty ótti. Biz tamasha goldar soqtyq. Jigitter baryn salyp oınap, tamasha oıyn órnegin kórsetti» - dedi.
Sondaı-aq, qazaqstandyq bapker elimizdiń Premer-Lıgasynyń kósh basyndaǵy úsh komandanyń deńgeıin Reseı birinshiligindegi komandalardan esh kem emestigin jetkizdi.
Esterińizge sala keteıik, qazir Qazaqstannyń Premer-Lıgasynda eki aptalyq úzilis. Sondyqtan «Qaırat» fýtbol klýbynyń basshylyǵy tehnıka-taktıkalyq máselelerdi sheshý úshin jáne oıynshylardyń sheberligin shyńdaý maqsatynda atalmysh joldastyq kezdesýdi uıymdastyrýǵa kúsh salǵan bolatyn.
Al eki dúrkin Reseı chempıony «Rýbın» komandasy óz tarıhynda tuńǵysh ret 2008 jyly chempıondyq ataǵyn jeńip alǵan.
