Fýtbol: Reseı EÝRO-2016 týrnırinde Anglııamen teń tústi
ASTANA. QazAqparat - Frantsııada fýtboldan ótip jatqan Eýropa chempıonatynda Reseı men Anglııa quramalary teń tarqasty.
Marselde ótken match 1:1 esebimen aıaqtaldy.
Birinshi taımda Anglııa fýtbolshylarynyń belsendiligi basym boldy. Adam Lallana, Krıs Smollıng, Harrı Keın, Ýeın Rýnı reseılik qaqpashy Igor Akınfeevke biraz ter tókkizdi.
70-mınýttan keıin aǵylshyndar qysymdy odan ári kúsheıtip, reseılikterdi biraz sheginýge májbúrledi. Oıynnyń 74-mınýtynda Anglııa quramasy sapynan Erık Daıer aıyp soqqysyn oryndaý barysynda esep ashty. Kezdesýdiń 82-mınýtynda aǵylshyndar taǵy bir gol salǵan bolatyn, alaıda Sterlıng shabýyl barysynda offsaıdqa túsip qaldy. Reseı komandasy sońyna deıin arpalysty jáne bul isi nátıje berdi. Kezdesýdiń sońǵy sekýndtary qalǵanda (93-mınýt) Denıs Glýshakov buryshtamadan áýelete berilgen dopty baspen qaqpaǵa dál baǵyttaı aldy.
Aıta keteıik, fýtboldan Eýropa chempıonaty Frantsııada ótýde. Birinshiliktiń aıasy bıyldan bastap keńeıip, qurlyqtyq dodada 16 qurama emes, 24 komanda oınaıtyn bolady. Fýtbolsúıer qaýym «kári qurlyqtyń» eń myqty quramalarynyń qatysýymen 51 match tamashalaı alady.
Eýropa birinshiligi Frantsııanyń on qalasynda 10 maýsym men 10 shilde kúnderi aralyǵynda ótedi.
Barlyq matchtar «Qazaqstan» men «Qazsport» telearnalarynda tikeleı efırde kórsetiledi.
