FÝTBOL: Premer-lıganyń ІІI týrynda «Ertis» top bastady
ASTANA. QazAqparat - Búgin fýtboldan el premer-lıgasynyń ІІI týr oıyndary ótip, óz alańynda "Atyraý" klýbyn 3-0 esebimen jeńgen pavlodarlyq "Ertis" 9 upaımen kósh bastady. Al olarǵa des bergen atyraýlyqtar týrnırlik kestede on birinshi orynǵa syrǵydy, dep jazady massaget.kz.
Úsh týrdyń nátıjesi boıynsha elordalyq "Astana" klýbynyń da upaıy túgel. Alaıda dop aıyrmashylyqtary pavlodarlyqtardan kem bolýyna baılanysty olar týrnır kestesiniń ekinshi ornyna kelip turaqtady. Aıta keterligi, "Astana" búgin óz alańynda "Aqtóbe" klýbyn 1-0 esebimen jeńgen bolatyn. Bul tartysty oıyndaǵy jalǵyz goldy 83 mınýtta Patrık Tvýması soqty. Jeńilis tapqan aqtóbelikter onynshy orynǵa taban tiredi.
Úshtikti qostanaılyq "Tobyl" klýby qorytyndylap tur. Búgin qaraǵandylyq "Shahterdy" qabyldap, 3-0 esebimen jeńiske jetken bul ujymnyń enshisinde 6 upaı bar. Dál osyndaı upaımen tórtinshi orynǵa Taldyqorǵanǵa qonaqqa baryp, alań ıelerin 1-2 esebimen jeńgen "Ordabasy" jaıǵasty. Atalmysh ujymdarǵa ese jibergen "Shahter" men "Jetisý" klýbtary týrnırlik kestede on ekinshi jáne segizinshi oryndarǵa túsip ketti.
Besinshi jáne altynshy oryndarda búgin ózara baq synasqan "Taraz" ben "Oqjetpes" ujymdary tur. Olardyń qanjyǵasynda 4 upaıdan bar. Al Tarazda ótken búgingi oıynda kókshetaýlyqtar 3-1 esebimen jeńiske jetken bolatyn.
Sonymen qatar óz alańynda almatylyq "Qaıratty" 2-1 esebimen jeńip, sensatsııa jasaǵan "Aqjaıyq" klýby jetinshi orynǵa kóterildi. Qanjyǵasynda ázirge tek 1 upaıy bar "Qaırat" toǵyzynshy oryndy qanaǵat tutýda.
