FÝTBOL: Premer-Lıga klýbtaryna áıelder komandalary da qosylýy múmkin
ASTANA. QazAqparat - Qazaqstanda aldaǵy ýaqytta erler arasyndaǵy Premer-Lıga klýbtaryna áıelder komandalaryn qosý máselesi qaralmaq. Bul týraly áıelder fýtbolynyń 2015 jylǵy maýsymynyń ashylýyna oraı ótken baspasóz máslıhatynda málim boldy.
Kásipqoı fýtbol lıgasynyń tóraǵasy Baǵlan Ergeshev, Qazaqstan fýtbol federatsııasy áıelder komıtetiniń tóraǵasy Baýyrjan Ábdýbaıytov jáne áıelder fýtbol bóliminiń jetekshisi Ánýar Bıdanov baspasóz máslıhatyna qatysyp, onda fýtboldan QR Chempıonaty men Kýbogyna qatysatyn komandalardyń kapıtandary men qaqpashylaryna oıyn jeıdesi tabys etilgen.
«FIFA Ulttyq áıelder lıgasyn qoldaý baǵdarlamasy boıynsha Qazaqstan áıelder lıgasyna alǵash ret oıyn jeıdeleri men fýtbolǵa arnalǵan jabdyqtardy tabys etip otyr. Biz ÝEFA men FIFA tarapynan úlken senimdi túsinemiz jáne barlyq jobalardy sátti júzege asyrýǵa bar kúshimizdi salamyz. Sonymen qatar Qazaqstan fýtbol federatsııasynyń prezıdenti Erlan Qojaǵapanov aldaǵy ýaqytta erler arasyndaǵy Premer-Lıga klýbtaryna áıelder komandalaryn qosý máselesi qaralatynyn aıtqan bolatyn. Meniń oıymsha, osy arqyly áıelder fýtbolyna kóp kóńil bólinedi», - dedi Kásipqoı fýtbol lıgasynyń tóraǵasy Baǵlan Ergeshev.
Al QFF áıelder komıtetiniń tóraǵasy Baýyrjan Ábdýbaıytovtyń aıtýynsha, áıelder komandalaryn qosý jóninde joba úsh jyl boıyna júzege asady.
«Alǵashqy jyly 17 jasqa deıingi jasóspirim komandalary bolýy kerek. Ekinshi jyly 17 jáne 19 jasqa deıingi jasóspirimder komandasy qurylýy tıis. Úshinshi jyly eresekter arasyndaǵy áıelder komandasy qurylyp, Qazaqstan chempıonatyna qatysady. Barlyq aımaqta balalar-jasóspirimder sport mektebinde qyzdar fýtbolynyń toptary bar ekenin eskersek, bul joba klýbtar úshin únemdi ári qoljetimdi bolmaq», - dedi ol.
Eske sala keteıik, búgin Shymkent qalasynda áıelder arasynda Qazaqstan Kýbogynyń fınaldyq oıyny ótýde.
