Fýtbol: Óz alańyndaǵy matchta «Astana» «Atletıko»-men teń tústi
ASTANA. QazAqparat - ÝEFA Chempıondar lıgasynyń toptyq kezeńinde «Astana-Arena» stadıonynda kezdesken elordamyzdyń «Astana» komandasy men ıspandyq «Atletıko» klýby bir-biriniń qaqpasyna gol sala almady. Osylaısha, eki komanda da toptyq kezeńniń bir-bir upaıyna ıe boldy.
Birinshi taımnan keıin alań qonaqtary shabýyldy údetip, «Astana»-nyń qaqpasyna gol salýǵa tyrysty. Alaıda «Astana» komandasy osal emes ekenin dáleldep, «Barselona» men «Realdy» jeńgen «Atletıko»-men teń tústi. Tipti, kerisinshe, «Atletıko» qaqpashysyn sastyrǵan sátter kóp boldy. Oıyn barysynda Baýyrjan Jolshıev eskertý alsa, Marın Anıchıcha murnyn jaralady. Oıyn sońynda ıspandyqtar shabýyldy údetip, «Astana» qaqpasynyń aldynda qaýipti sátter kóbeıe tústi. Biraq «Astananyń» qaqpashysy Nenad Erıch pen ózge de fýtbolshylarynyń myqty oıyny match sońyna deıin esepti teń ustady. Esterińizge sala keteıik, 22 qazan kúni «Astana» komandasy Madrıdte «Atletıko» klýbynan 4:0 esebimen utylyp qalǵan edi. «Astana» komandasynyń búgingi quramy: Nenad Erıch, Marın Anıchıch, Nemanıa Maksımovıch, Foksı Ketevoma, Serikjan Mujyqov, Baýyrjan Jolshıev, Branko Ilıch, Evgenıı Postnıkov, Dmıtrıı Shomko, Rodjer Kanıas, Djýnıor Kabananga. Rezervtegi oıynshylar: Vladımır Logınovsıı, Denıs Dedechko, Eldos Ahmetov, Georgıı Jýkov, Alekseı Şetkın, Igor Pıkalkın, Abzal Beısebekov. «Atletıko» komandasynyń oıynshylary: Oblak, Dıego Godın, Gılermo Sıkeıra, Tıago, Koke, Antonı Grızmann, Fernando Torres, Gabı (k), Saýl, Hýanfran, Hose Marııa Hımenes. Endi 25 qarashada saǵat 21.00-de qazaqstandyqtar lıssabondyq «Benfıka»-ny qabyldaıdy.
