Fýtbol oınaýdyń qazaqstandyq stılin qalyptastyramyz - QFF
ASTANA. QazAqparat - Qazaqstan fýtbol federatsııasy aıaqdop óneriniń qazaqstandyq stılin qalyptastyrýdy kózdeıdi. Atalǵan mindet uıymnyń "Alǵa, fýtbol! Alǵa, Qazaqstan!" atty jańa strategııasynda belgilengen, dep xabarlaıdy QazAqparat tilshisi.
QFF Bas xatshysy Azamat Aıtxojınniń aıtýynsha, bıylǵy strategııada áıelder fýtbolyn damytý, oıynshylardy ozyq qural-jabdyqtarmen qamtamasyz etý, legıonerlerdi irikteýdi kúsheıtý jáne taǵy basqa mańyzdy máseleler kórsetilgen.
"Álem boıynsha fýtboldyń san alýyn stılderi bar. Latynamerıkalyq stıl, brıtandyq stıl, ıtalıandyq stıl jáne taǵysyn taǵy. Qazirgi kezde biz arnaıy jol kartasyn ázirlep jatyrmyz. Ol qujatta batyl bir maqsat - fýtboldyń qazaqstandyq stılin qalyptastyrý mindeti kórsetilgen. Sonyń arqasynda Qazaqstannyń fýtboly barsha álemge tanylady degen jospar bar. Árıne, oǵan barlyǵymyz kúsh salýymyz qajet", - dedi A.Aıtxojın Qazaqstan fýtbol federatsııasynyń XVII konferentsııasynda.
Aıta ketken jón, konferentsııada uıymnyń birqatar máselelerin talqylaý josparlanǵan. Otyrysta federatsııanyń atqarýshy komıtetine jańa músheler de saılanady.
