«Fýtbol oınaǵandy» qoıý qajet - Saǵyntaev
Búginde energetıkalyq qaýipsizdik boıynsha birqatar mindettemeler ákimdikterge júktelgen. Memlekettik organdar da baqylaý sharalaryn júrgizedi. Alaıda Shaxandaǵy jarylys sııaqty tótenshe jaǵdaılar bolǵanda jergilikti bılik pen memlekettik organdar bir-birine siltep jatady, dep xabarlaıdy QazAqparat tilshisi.
"Maǵan bir nárse unamaı tur, (energetıkalyq qaýipsizdik boıynsha - avt.) ókilettilikterdi ózara bólisip, ákimdikterge berdik, aldyq dep otyrsyzdar. Alaıda eshqandaı jaýapkershilik joq. Endi, ony (memlekettik organdarǵa - avt.) taǵy qaıtarý kerek pe, joq álde, qadaǵalaý sharalaryn kúsheıtemiz deısizder. Ol durys emes qoı. Ókilettilik berilgennen keıin jergilikti atqarýshy organdar óz mindetterin buljytpaı oryndaýy tıis. Bizde energetıka mınıstrliginde energetıkalyq qadaǵalaý qyzmeti bar. Ol qaıda qarap otyr? Sóıtip, jergilikti bılikke ókilettilikti berdik deımiz, olar bolsa, ortalyqtandyrylǵan jylý júıesin qosaıyn desek, ortalyq aqsha bermeı otyr dep shyǵady. Ortalyq organdar bolsa, aqsha bereıin desek, jergilikti bılik qujattardy jibermeı jatyr deıdi. Osylaısha, «fýtbol oınap» otyrady. Aqyr sońynda Shaxan sııaqty eldiń mekenderdiń jylytýǵa qatysty barlyq problemalardy xalyqtyń moınyna artyp qoıdyq. Osydan keıin adamdar amal joq, pesh qoıady, "býrjýıka" ornatady, neshe túrli qazandyqtardy kirgizedi. Úıdi óz kúshimen jylytady. Sosyn keshegideı qaıǵyly oqıǵalarǵa tap bolamyz", - dedi B.Saǵyntaev.
Onyń oıynsha, eger úıdi jylytý qondyrǵylary qaýipti bolsa, onda naqty bir talaptardy ázirleý kerek. Osyǵan baılanysty naqty bir qujattyń bolǵany jón. "Bylaısha aıtqanda, naqty bir jumysty qolǵa alǵan jón. Biz bolsaq, áı, jylý bolsa boldy dep, salǵyrt qarap otyrmyz", - dep atap kórsetti Úkimet basshysy.
Osy oraıda Úkimet basshysy B.Saǵyntaev óz orynbasary Asqar Mamınge jergilikti ákimdikter men memlekettik organdardyń ózara jaýapkershiligin naqty belgilep alýdy tapsyrdy. Ol úshin arnaıy jumys toby qurylatyn bolady.
