Fýtbol: «Ordabasyny» utqan «Qaırat» úshinshi orynǵa kóterildi
NUR-SULTAN. QazAqparat – Fýtboldan Qazaqstan chempıonatynyń segizinshi týrynda Almatynyń «Qaıraty» óz alańynda Shymkenttiń «Ordabasy» komandasyn qabyldady, dep habarlaıdy QazAqparat tilshisi.
Qos komanda da el birinshiliginde úzdik shyǵýdan úmitker, ásirese, ótken týrda kútpegen jerden «Atyraýǵa» ese jibergen «Qaıratqa» sheginer joq edi.
Almatylyqtardyń bapkeri bul joly shabýyl shebinde brazılııalyq Vagner Lavqa qosa ýkraınalyq Aderınsola Eseolaǵa úmit artty. Alaıda 25-mınýtta qonaqtardyń qorǵaýshysyna qarsy dóreki oınaǵan V.Lavqa qaraǵandylyq tóreshi Artem Kýchın áýeli sary, sosyn qyzyl qaǵaz kórsetti.
Shymkenttikter san basymdyǵyna ıe bolǵanymen, oıyn tizginin el chempıondary ýysynan shyǵarǵan joq. Aqyry 61-mınýtta qarsy shabýyldy qyrǵyzstandyq Gúljigit Alyqulov ádemi uıymdastyryp, Sergeı Keılerge pas berdi. Ol aıyp alańynan tabylǵan A.Eseolaǵa syrǵytty. Eseola múmkindigin múlt jibergen joq.
Oıynǵa tyńnan qosylǵan shabýylshylar Shtrelı Mamba men Hose Kante de qanjyǵalaryn maılap, esepti 3:0-ge jetkizdi.
Osylaısha 15 upaı jınaǵan «Qaırat» týrnır kestesinde úshinshi orynǵa kóterildi. «Astana» 20 upaımen kósh bastap kele jatsa, «Taraz» (17 upaı) ekinshi orynda tur.
Kelesi týrda «Aqtóbe» - «Astana», «Atyraý» - «Kaspıı», «Tobyl» - «Taraz», «Qyzyljar» - «Qaırat», «Ordabasy» - «Turan», «Aqjaıyq» - «Jetisý» komandalary ózara kezdesedi.
Eske sala keteıik, budan buryn «Astananyń» óz alańynda «Aqjaıyqtan» basym túskenin jazǵan bolatynbyz.
