Fýtbol: «Ordabasy» óz alańynda «Aqjaıyqty» utty
ASTANA. QazAqparat - Búgin el birinshiliginiń HV týrynda Shymkentte «Ordabasy» komandasy Oraldyń «Aqjaıyǵyn» qabyldady, dep habarlaıdy QazAqparat tilshisi.
Alań ıeleriniń basymdylyǵymen ótken matchta qonaqtar birinshi bolyp esep ashty. 40-mınýtta oń qanattan Ivan Antıpovtyń bergen dobyn senegaldyq Malık Mane baspen qaqpaǵa dál soqty.
Bes mınýt óter-ótpeste standartty jaǵdaıdan keıin «Aqjaıyqtyń» kapıtany Meıram Sapanovtyń basy men aıaǵyna tıgen dopty qaqpa aldynda jalǵyz turǵan Erkebulan Tuńǵyshbaev jyljyta saldy.
Ekinshi taımda «Ordabasynyń» bas bapkeri Kahaber Tshadadze tyńnan oıynshylar qosty. Bul taktıka óz jemisin berdi. Oıyn sońyna taman qorǵaýshylardyń qateligin paıdalanǵan ózbekstandyq shabýylshy Ivan Nagaev jeńis golyn soǵyp ketti - 2:1.
Bul týrdan keıin 22 upaı jınaǵan «Ordabasy» burynǵysha tórtinshi orynda keledi. Qatarynan úsh márte jeńilis tapqan «Aqjaıyq» jetinshi orynǵa syrǵydy.
Aıta keteıik, tosyn nátıje Qostanaıda tirkeldi. Týrnır kestesinde úshinshi orynda kele jatqan «Tobyl» óz alańynda aqtóbelikterge 2:3 esebimen ese jiberdi. Bul kezdesýde armenııalyq legıoner Markos Pızellı het-trıktiń avtory atandy. M.Pızellı 9 doppen mergender kóshin bastady.
Sol sekildi Qyzylordanyń «Qaısary» Pavlodarda 90-mınýtta «Ertisten» jeńisti julyp aldy - 1:0.
Osyǵan deıin alty ret qatarynan jeńilgen Qaraǵandynyń «Shahteri» óz alańynda «Atyraýdy» 3:0 esebimen oısyrata utyp, segizinshi orynǵa kóterildi. Taldyqorǵanda Petropavldyń «Qyzyljaryn» 2:1 esebimen utqan «Jetisý» besinshi orynǵa shyqty.
Týrdyń ortalyq matchy erteń Almatyda «Qaırat» pen «Astana» arasynda ótedi.
