Fýtbol: «Ordabasy» Qyzylordaǵa bas bapkersiz keledi
QYZYLORDA. QazAqparat - Qyzylordada «Qaısarmen» erteń, ıaǵnı 15 naýryzda bolatyn alǵashqy oıynǵa Shymkenttiń «Ordabasy» komandasy bas bapkersiz kelýi múmkin, dep habarlaıdy oblystyq Dene shynyqtyrý jáne sport basqarmasynyń baspasóz qyzmetinen.
Sebebi, maýsymdaǵy alǵashqy oıynǵa eki kún qalǵanda nege ekeni belgisiz, «Ordabasynyń» bas bapkeri ketip qaldy. Búgingi kúnge deıin bul qyzmetti Vıktor Pasýlko atqarǵan edi. Klýb basshylyǵy onymen aradaǵy kelisim-shartty úzdi.
Endigi kezekte Qyzylordadaǵy alǵashqy kezdesýge komandany bas bapkerdiń kómekshisi Qýanysh Qaraqulov bastap barady. Aldaǵy ýaqytta bul qyzmetti rýmynııalyq maman Avgýstın Kırıtsa nemese qazaqstandyqtar Qýanysh Qaraqulov pen Talǵat Baısýfınovtiń bireýi atqarýy múmkin. Ázirge naqty sheshim qabyldanǵan joq. Al oıynnyń bastalýyna bir-aq kún qaldy.
