Fýtbol: «Ordabasy» kapıtany «Tobylǵa» keldi
QOSTANAI. QazAqparat - Qazaqstan ulttyq quramasynyń oıynshysy Azat Nurǵalıev Qostanaıdyń «Tobylyna» kóshti, dep habarlaıdy QazAqparat tilshisi.
Shymkent fýtbol mektebiniń túlegi Azat Nurǵalıev «Tobylmen» 1 jylǵa kelisimshartqa otyrdy.
«Bul Nurǵalıevtiń «Tobylǵa» ekinshi ret kelýi. Ol 2010 jyly qostanaılyq ujym sapynda el chempıony atandy. Buǵan qosa, Qazaqstan Kýbogy men Intertoto Kýbogyn utty. Tájirıbeli oıynshy «Tobyl» quramyn kúsheıteri sózsiz. Qazir Azat komandamen Túrkııada oqý-jattyǵý jıyndarynda júr», - dedi «Tobyldyń» baspasóz hatshysy Konstantın Doljanskıı agenttik tilshisine.
Aıta keteıik, Azat Nurǵalıev byltyrǵy maýsymda «Ordabasynyń» kapıtany boldy. Onyń aldynda «Jetisý» jáne «Suńqar» klýbtaryna jalǵa berilgen. Birshama ýaqyt «Astanada» oınady.
Ulttyq quramaǵa alǵash 2009 jyly shaqyryldy. Jalpy eldiń basty komandasynda osy ýaqytqa deıin 29 oıynǵa qatysqan.
