Fýtbol: «Ordabasy» «Atyraýdy» 2:0 esebimen jeńdi
ShYMKENT. QazAqparat - Ońtústik Qazaqstan oblysynyń «Ordabasy» fýtbol komandasy «Atyraýdy» 2:0 esebimen utty. Erkebulan Tuńǵyshbaev pen Tańat Nóserbaev osylaısha shymkenttik jankúıerlerine tamasha tartý jasady, dep habarlaıdy QazAqparat HAA tilshisi.
Matchty «Ordabasy» komandasynyń fýtbolshylary joıqyn shabýyldarmen bastady. Ásirese Mardan Tólebektiń aıyp alańynyń syrtqy jaǵynan jasaǵan soqqysy qaqpa baǵanasyna tıip, keri qaıtty. Osy dopty áýede qaıshylap qaıta soqqan Erkebulan Tuńǵyshbaevtyń soqqysyna qaqpashy Narzıqulov tosqaýyl qoıdy. Úshinshi ret shalqalaı jatyp tepken Roher Kanıastyń doby da qaqpaǵa kirmedi. Jankúıerlerdiń asa zor qoldaýyna ıe bolǵan Alekseı Petrýshın shákirtteri qaıta -qaıta qaqpany nysanaǵa alǵanymen, birinshi taımda esep ashýdyń reti kelmedi. «Atyraý» sapynda jeke dara qaqpaǵa bet alǵan Aıbar Nurybaevtyń shabýyly da eshbir nátıje bermedi.
Ekinshi taımda «Atyraý» komandasynyń bas bapkeri Sergeı Pavlov Aıbar Nurybaevtyń ornyna Djokıchti almastyrdy. Osy bir almasý qonaqtardyń oıynyndaǵy taktıkany qoldan shyǵaryp alǵandaı boldy. Ǵalamat kúshke ıe bolǵan Abdýllaı Dıakate alańnyń ortasynan kezekti shabýylyn bastap, úsh birdeı oıynshyny aldaý arqyly keremet soqqy jasady. Dopty Narzıqulov qaǵyp qaldy. Oıynnyń 68-shi mınýtynda Mardan Tólebek sol qanattan taǵy bir joıqyn shabýyldy bastady. Onyń aıyp alańyna tastaǵan dobyn baqylaýdan shyǵaryp alǵan qaqpashynyń qateligin Erkebulan Tuńǵyshbaev utymdy paıdalandy. Esep 1-0.
Oıynǵa jańa aralasqan Tańat Nóserbaev birden bas mergen retinde komandalastaryn alǵa jeteledi. Kezekti shabýyldy endi oń qanattan bastaǵan Nıkıta Bacharovtyń qaqpaǵa qıyp tastaǵan dobyna Azat Nurǵalıev sál ǵana jete almaı qaldy. Qaqpashy Azatty qorǵap júrgende Tańat Nóserbaev tamasha soqqymen gol saldy. Esep 2-0 boldy.
Kezdesý barysynda Farhadbek Irısmetov jankúıerlerdiń yqylasyna bólendi.
Oıynnan soń «Ordabasy» KFK AQ prezıdenti Baqtııar Baıseıtov óz pikirin bildirip ketti.
«Kezdesý óte kúrdeli boldy. Syrt alańdaǵy eki ret qatarynan bolǵan jeńilistiń ornyn toltyrý úshin jigitter baryn saldy. Qanshama keremet shabýyldar uıymdastyrdy. Statıstıkalyq esep júrgizetinder baıqap otyrǵan shyǵar, «Ordabasy» shabýylshylary jeti ret aıyp alańynyń ortasynda shalqalaı teýip, qaıshylaý ádisimen dopty qaqpaǵa baǵyttapty. Onyń biri qaqpaǵa engende fýtbolshylardyń sheberligi budan da bıikteı túsken bolar edi. Jankúıerler keremet ashyq fýtbol spektaklin kórgendeı boldy. Іzbasarlarymnyń bul jeńisin dál osy kúni atalyp ótip jatqan «Sport kúni» merekesine arnaımyz. Osy bir sátti paıdalana otyryp barlyq sala qyzmetkerlerin, Sportshylar men bapkerlerdi, Fýtbol jankúıerlerin kásibı merekelerimen quttyqtaımyn!»,- dedi Baqtııar Baıseıtov.
Endi kúngeılik komanda 26-tamyz kúni Qyzylorda qalasynda jergilikti «Qaısarmen» kezdesedi. Jankúıerler naǵyz tartysty oıyn sonda bolady dep otyr.
