Fýtbol: «Ordabasy» «Astanaǵa» jaqyndap keledi
ASTANA. QazAqparat - Fýtboldan Qazaqstan chempıonaty birinshi kezeńi alǵashqy aınalymynyń qorytyndy týrynda kútpegen nátıje de bolmaı qalǵan joq, dep habarlaıdy «QazAqparat» tilshisi.
Osyǵan deıin jeńilistiń aşy dámin tatpaǵan Almatynyń «Qaıraty» Atyraýda aıaq astynan utylyp qaldy. Sergeı Pavlov komanda tizginin qolǵa alǵannan keıin jaǵdaıy túzele bastaǵan atyraýlyqtar bul oıynda 2:1 esebimen jeńiske jetti. 26-mınýtta buryshtamadan berilgen dopty ıAn Vorogovskıı abaısyzda óz qaqpasyna soǵyp aldy. Al ekinshi taımda Shavkat Salomovtyń pasyn sheber paıdalanǵan Vladımır Dvalıshvılı esepti 2:0-ge jetkizdi. Budan keıin almatylyqtar qanshama tyrysqanymen, qosymsha mınýttarda Baýyrjan Turysbektiń mergendigi arqasynda esepti tek qysqarta aldy. Osylaısha oıda joq jerden utylyp qalǵan «Qaırat» týrnır kestesinde tórtinshi orynǵa syrǵyp ketti.
Ótken týrda «Qaıratpen» teń oınaǵan «Astana» Qostanaıda «Tobylmen» kezdesti. Osynyń aldynda Oralda «Aqjaıyqtan» utylyp qalǵan qostanaılyqtar baryn saldy. 71-mınýtta Jasulan Moldaqaraevtyń pasynan keıin komandanyń surmergeni Alekseı Şetkın esep ashty. Degenmen «Astana» quramyndaǵy kongolyq Jýnıor Kabananga da qarap qalǵan joq. Alań ıeleriniń qorǵanystaǵy qateligin paıdalanǵan ol tarazy basyn teńestirip ketti.
Astanalyqtardyń eki upaı joǵaltqany shymkenttikterge qolaıly boldy. Óz alańynda «Aqjaıyqty» 3:0 esebimen (gol avtorlary - Pablo Fontanelo, Temirlan Erlanov, Tańat Nóserbaev) oısyrata jeńgen «Ordabasy» 22 upaı jınap, kósh basyndaǵy «Astanaǵa» (24 upaı) jaqyndaı tústi. Degenmen astanalyqtardyń bir oıyny kem ekendigin aıta keteıik. Úshinshi orynǵa Qaraǵandyda «Shahterdi» 1:0 esebimen (gol soqqan Pıraly Alıev) tize búktirgen Pavlodardyń «Ertisi» (20 upaı) kóterildi.
Birinshilikti úsh birdeı jeńispen tamasha bastaǵanymen, keıin «aıaǵyna jem túsken» Qyzylordanyń «Qaısary» bul joly óz alańynda «Aqtóbeni» qabyldap, 3:2 esebimen jeńisti julyp aldy. Aldymen Vladımır Arjanov qos doptyń avtory atansa, odan keıin aqtóbelikter (Vıtor Jýnıor, Igor Zenkovıch) esepti teńestirdi. Qosymsha mınýtta «Aqtóbeniń» qaqpasyna 11 metrlik aıyp doby belgilenip, ony «Qaısardyń» kapıtany Maqsat Baıjanov sátti oryndaı bildi. Sóıtip «Qaısar» qaıtadan altynshy orynǵa shyqty. Al Tarazda jergilikti komandany 1:0 esebimen (Tımýr Dosmaǵambetov) utqan Kókshetaýdyń «Oqjetpesi» segizinshi orynda keledi.
Aıta keteıik, 14 mamyr kúni birinshi kezeńniń ekinshi aınalymy bastalady. Onda «Taraz» - «Qaısar», «Oqjetpes» - «Qaırat», «Aqtóbe» - «Tobyl», «Atyraý» - «Ordabasy», «Shahter» - «Aqjaıyq», «Astana» - «Ertis» komandalary ózara kúsh synasady.
