Fýtbol: Ordabasy — Atyraý matchynda qatelikke jol bergen tóreshiler qyzmetinen shettetildi
ASTANA. KAZINFORM — Fýtboldan Qazaqstan chempıonatynyń tórtinshi týrynda «Ordabasy» (Shymkent) — «Atyraý» matchyna qazylyq etken Sanjar Ysqaqov pen Tatıana Sorokopýdovaǵa qatysty sheshim qabyldandy.
Qazaqstan fýtbol federatsııasynan málim etkenindeı, atalǵan tóreshiler ulttyq jarystar aıasyndaǵy matchtarda qyzmet kórsetýden ýaqytsha shettetildi.
— Bul sheshim Qazaqstan Premer-lıgasynyń sońǵy týrynda jiberilgen birqatar óreskel ári mańyzdy qatelikterge baılanysty qabyldandy. Atalǵan qatelikter match nátıjesine áser etti. Olardyń aldaǵy mártebesine qatysty túpkilikti sheshim QFF-nyń quzyretti organdary tarapynan jan-jaqty tekseris júrgizilgennen keıin qabyldanady, — delingen resmı aqparatta.
«Ordabasy» — «Atyraý» matchynda 82-mınýtta atyraýlyqtar soqqan ekinshi goldy bas tóreshi Sanjar Ysqaqov VAR-dy qaraǵannan keıin eseptemeı qoıǵan edi. Eger eseptelgen jaǵdaıda «Atyraý» 2:0 esebimen alǵa shyǵatyn edi. Oǵan qosa 97-mınýtta tóreshi atyraýlyqtar qaqpasyna penaltı belgilep, shymkenttikter esepti teńestirip ketti. Bul sheshimniń de qate bolǵany keıin moıyndaldy.
Eske sala keteıik, budan buryn «Qaırattyń» «Astanany» iri eseppen jeńgenin jazǵan bolatynbyz.
