Fýtbol: Oraldyń «Aqjaıyǵyna» jańa oıynshylar qabyldandy
ORAL. QazAqparat - Bıyl fýtboldan Qazaqstan birinshiliginiń sýperlıgasynda óner kórsetetin Oraldyń «Aqjaıyǵy» Túrkııada 5-21 qańtar aralyǵynda ótkizilgen oqý-jattyǵý jıynynan oraldy.
«Aqjaıyq» fýtbol klýbynyń baspasóz qyzmetinen alynǵan málimetke qaraǵanda, oraldyq komanda sol jıyn kezinde úsh joldastyq kezdesý ótkizip, úmitkerlerdi qarap kórdi. Solardyń ishinen úsh fýtbolshymen, atap aıtqanda, serbııalyq jartylaı qorǵaýshy Predrag Govedarıtsa, «Tarazdan» kelgen taǵy bir jartylaı qorǵaýshy Edýard Sergıenko jáne paragvaılyq Freddı Koronelmen resmı túrde kelisimshartqa qol qoıyldy.
Aıta keteıik, 31 jastaǵy P.Govedarıtsa - Belgrad fýtbolynyń túlegi. Serbııalyq komandalarda óner kórsetkennen keıin 2010 jyly Pavlodardyń «Ertisine» aýysqan. Sol kezde «Ertisti» «Aqjaıyqtyń» qazirgi bas bapkeri Talǵat Baısýfınov jattyqtyrǵany belgili. Sondyqtan oǵan serbııalyq jartylaı qorǵaýshy jaqsy tanys. 32 jastaǵy E.Sergıenko Donetskide (Ýkraına) fýtbol álippesin úırengen. Qazaqstandyq komandalarda, sonyń ishinde «Ertiste» oınaǵan. Ol da - T.Baısýfınovtyń synynan ótken fýtbolshy. 26 jasar F.Koronel paragvaılyq klýbtarda, al 2014-2015 jyldary argentınalyq «Rıvadavııa» komandasynda dop tepken.
