Fýtbol: Oraldyń «Aqjaıyǵy» jańa oıynshymen tolyqty
ORAL. QazAqparat - Premer-lıgaǵa qaıta oralýdy maqsat etip otyrǵan «Aqjaıyq» komandasy 24 jasar qorǵaýshy Erbolat Rústemovpen kelisimshartqa otyrdy, dep habarlaıdy QazAqparat tilshisi.
«Aqjaıyq» fýtbol klýbynyń baspasóz qyzmetinen túsken málimetke qaraǵanda, oraldyqtarǵa Qyzylordanyń «Baıqońyr» komandasynan kelip qosylǵan E.Rústemov sporttyq jolyn 2014 jyly «Qaısardyń» ekinshi quramynda bastady.
Keıin klýb basshylyǵy Erbolatty «Baıqońyrǵa» aýystyrǵan. Sońǵy tórt maýsymdy «Baıqońyr» sapynda ótkizgen qorǵaýshy 89 oıynda 13 goldyń avtory atandy.
Túrkııadaǵy alǵashqy oqý-jattyǵý jıynyn aıaqtaǵan «Aqjaıyqtyń» bas bapkeri, ýkraınalyq maman Sergeı Zaıtsevtiń aıtýynsha, qazirgi kezde komanda quramy 60 paıyzǵa jasaqtaldy. Áli de jańa fýtbolshylar qaralymǵa kelip, synnan ótetin bolady. Eń bastysy, jastar oqý-jattyǵý jıynynda ter tógýmen birge basqa komandalarmen kezdesip, sheberlikterin shyńdaýǵa múmkindik aldy. Aldaǵy jıynda odan da myqty klýbtarmen oınaý josparlanǵan. Sol kezde quramdy naqtylap, chempıonatqa tas-túıin daıyndyqpen kelý kózdelýde.
Eske sala keteıik, budan buryn «Aqjaıyqtyń» úsh oıynshymen kelisimshartty uzartqanyn jazǵan bolatynbyz.
