Fýtbol: Oraldyń «Aqjaıyǵy» jańa maýsymǵa daıyndyqqa kiristi
ORAL. QazAqparat - Fýtboldan QR chempıonaty premer-lıgasynda óner kórsetetin Oraldyń «Aqjaıyǵy» jańa maýsymǵa daıyndyqqa kiristi, dep habarlaıdy QazAqparat tilshisi.
«Aqjaıyq» fýtbol klýbynan alynǵan málimetke qaraǵanda, oraldyqtar komanda bapkeri Artýr Avakıantstyń basshylyǵymen ázirge Oraldaǵy óz alańynda jattyǵýda. Oǵan negizinen jergilikti oıynshylar, sondaı-aq qosalqy jáne jastar quramasynan alynǵan fýtbolshylar qatysýda.
Maýsym aldyndaǵy bastapqy jıyn 31 jeltoqsanda aıaqtalyp, sodan keıin komanda tolyq quramda 8 qańtar kúni Antalıada bas qosady. «Aqjaıyqtaǵy» ózgerister sol kezde belgili bolmaq.
Aıta keteıik, batysqazaqstandyqtar bıylǵy el birinshiliginde otandyq maman Vahıd Masýdovtyń jetekshiligimen onynshy oryndy ıelengen bolatyn.
