Fýtbol: Oraldyń «Aqjaıyǵy» sońǵy orynǵa túsip qaldy

Jeksenbi kúni Aqtóbede jergilikti komandamen ótken kezdesýde oraldyqtar terezesi teń oıyn órnegin kórsetkenimen, alań ıelerine 0:1 esebimen ese jiberdi. Match sońyna taman, 85-mınýtta aqtóbelikterdiń kezekti shabýyly kezinde reseılik legıoner Nıkıta Bocharov aıyp alańyna kirmesten, Nurbolat Qalmenov qorǵaǵan qaqpany dál kózdedi. «Aqjaıyq» fýtbolshylarynyń da dop soǵatyndaı múmkindikteri bolǵanymen, ony paıdalana almady. Muny oıynnan keıingi baspasóz máslıhatynda komandanyń bas bapkeri mindetin ýaqytsha atqarýshy Artýr Avakıants ta atap ótti. Bas bapker demekshi, Talǵat Baısýfınov Qazaqstan ulttyq quramasyn tizginin ustaǵannan keıin BAQ betterinde «Aqjaıyqqa» belgili qazaqstandyq jattyqtyrýshy Vladımır Nıkıtenkonyń keletini aıtylýda. Osyǵan deıin kóptegen klýbtyń tizginin ustaǵan, sonyń ishinde «Aqtóbe» men «Atyraýdy» jattyqtyryp, odan abyroımen kete qoımaǵan V.Nıkıtenko «Aqjaıyqty» ushpaqqa shyǵara ala ma, ony ýaqyt kórsetedi.

Sóıtip tórt márte qatarynan jeńilis tapqan oraldyqtar sońǵy, 12-inshi orynǵa túsip qaldy. Senbi kúni Qaraǵandyda «Shahterdi» 1:0 esebimen tize búktirgen «Taraz» komandasy 13 upaımen on birinshi orynǵa kóterildi.

Oraldyqtar kelesi kezdesýin óz alańynda 8 shilde kúni kósh basynda kele jatqan «Astana» komandasymen ótkizedi.