Fýtbol: Oraldyń «Aqjaıyǵy» Pavlodardyń «Ertisin» utty
ORAL. QazAqparat - Túrkııada ekinshi oqý-jattyǵý jıynyn ótkizip jatqan «Aqjaıyq» joldastyq matchta Pavlodardyń «Ertisimen» alańǵa shyqty, dep habarlaıdy QazAqparat tilshisi.
Ótken jylǵy maýsymda pavlodarlyqtar onynshy orynǵa ıe bolyp, premer-lıgadaǵy ornyn saqtasa, oraldyqtar birinshi lıgaǵa túsip qalǵan-dy.
Bul kezdesýde «Aqjaıyqtyń» jas oıynshysy Ádilet Bolatovtyń soqqan ádemi goly match taǵdyryn sheshti - 1:0.
Oraldyqtardyń bas bapkeri, ýkraınalyq maman Sergeı Zaıtsevtiń aıtýynsha, gol soǵatyn múmkindikter az bolǵan joq.
«Kezdesý nátıjesi qýantady. Bizdiń maqsat - jattyǵý barysynda jasaǵan kombınatsııalardy júzege asyra bilý. Eń bastysy, alǵa jyljý bar. Ásirese, jas fýtbolshylar jaqsy qyrynan kórsetti. Bul baǵytymyzdyń durys ekendigin kórsetedi. Oıyndaǵy azdaǵan olqylyqty joısaq, jańa maýsymǵa tolyq daıyn bolamyz», dedi S.Zaıtsev.
Jıyn barysynda «Aqjaıyq» áli de birneshe joldastyq báseke ótkizedi.
Eske sala keteıik, budan buryn oraldyq klýbqa jańadan eki oıynshy alynǵanyn jazǵan bolatynbyz.
