Fýtbol: Oraldyń «Aqjaıyǵy» óz alańyndaǵy alǵashqy kezdesýin Aqsaı qalasynda ótkizedi
ORAL. QazAqparat - Fýtboldan premer-lıga komandalary arasyndaǵy el birinshiliginde Oraldyń «Aqjaıyǵy» óz alańyndaǵy alǵashqy kezdesýin Aqsaı qalasynda ótkizedi, dep habarlaıdy «QazAqparat» tilshisi.
«Aqjaıyq» fýtbol klýbynyń baspasóz qyzmetinen túsken málimetke qaraǵanda, 31 naýryz kúni Pavlodardyń «Ertisimen» bolatyn oıyn ótken jyly ashylǵan jańa dene shynyqtyrý-saýyqtyrý kesheniniń jasandy alańynda ótedi. Munda matchty 1200 kórermen tamashalaı alady.
Aıta keteıik, pavlodarlyqtar alǵashqy eki týrda «Atyraý» men «Aqtóbeni» óz alańynda 2:1 esebimen utqannan keıin 6 upaımen «Ordabasymen» (Shymkent) úshinshi-tórtinshi oryndardy bólisýde. Al keshe Qyzylordada «Qaısarmen» teń oınaǵan oraldyqtar toǵyzynshy orynda keledi.
Ótken jyly qos komanda úsh ret kezdesip, sonyń ekeýinde «Ertis» basym túsip, bireýin syrt alańda «Aqjaıyq» utqan.
