Fýtbol: Oraldyń «Aqjaıyǵy» óz alańynda «Qyzyljarǵa» ese jiberdi
ORAL. QazAqparat – Fýtboldan Qazaqstan chempıonatynyń tórtinshi týrynda «Aqjaıyq» Petropavldyń «Qyzyljaryn» qabyldady, dep habarlaıdy QazAqparat tilshisi.
Birinshi taımda qos komanda barynsha shabýyldap kórgenimen, esep ashylǵan joq.
Ekinshi taım basynda qonaqtardan chernogorııalyq jartylaı qorǵaýshy Darko Zorıch tepken dopty «Aqjaıyqtyń» qaqpashysy, ýkraınalyq Sergeı Lıtovchenko qaıtarǵanymen, ol oraldyq Eldar Abdrahmanovqa tıip, qaqpaǵa kirip ketti.
Budan keıin «Qyzyljar» oıynshylary negizinen qorǵanysqa kóshti.
«Aqjaıyq» jańadan fýtbolshylar qosyp, kúsh salǵanymen, eshteńe ózgermedi.
84-mınýtta «Qyzyljar» sapyndaǵy brazılııalyq shabýylshy Alves Danılo Almeıda dóreki oınap, alańnan qýyldy.
Osylaısha avtogol match taǵdyryn sheship, qonaqtar 1:0 esebimen jeńiske jetti.
Oraldyqtar kelesi kezdesýin 13 sáýir kúni syrt alańda «Shahtermen» ótkizedi. Bıyl súreńsiz oınap júrgen qaraǵandylyqtar búgin «Tarazdan» 0:4 esebimen jeńilip qaldy.
