Fýtbol: Oraldyń «Aqjaıyǵy» oqý-jattyǵý jıynyn ótkizý úshin Túrkııaǵa attandy
ORAL. QazAqparat - Fýtboldan el chempıonatynyń birinshi lıgasynda óner kórsetetin Oraldyń «Aqjaıyǵy» jańa maýsymǵa daıyndyqty pysyqtaý maqsatynda Túrkııaǵa attandy, dep habarlaıdy QazAqparat tilshisi.
«Aqjaıyq» fýtbol klýbynyń baspasóz qyzmetinen túsken málimetke qaraǵanda, komanda Antalııada oqý-jattyǵý jıynyn ótkizip, quramyn naqtylaıtyn bolady.
Premer-lıgaǵa qaıta oralýdy maqsat etip otyrǵan klýb jıyn barysynda birneshe sheteldik komandamen joldastyq kezdesý ótkizip, qaralymǵa kelgen oıynshylardy tekserip kórmek.
«Aqjaıyq» Túrkııaǵa mynadaı quramda attandy: qaqpashylar: Aleksandr Ýdalov, Sergeı Tkachýk, qorǵaýshylar: Baýyrjan Omarov, Maksım Lıtvınov, Arman Murat, Evgenıı Rafıkov, Vladımır Pokatılov, jartylaı qorǵaýshylar: Rýslan Qaıyrov, Magommed Odjıev, Shyńǵys Saparbekuly, Ádilet Bolatov, shabýylshylar: Alekseı Maltsev, Erjan Ibragımov, Danııl Kochnev.
Sonyń ishinde ótken jylǵy maýsymda komanda quramynda bolǵan qaqpashy Sergeı Tkachýk kelisimshart merzimin uzartty. Oıynshy mansabyn Kıevtiń «Dınamo» klýbynda bastaǵan S.Tkachýk keıin qazaqstandyq «Shahter», «Qaırat», «Kaspıı» komandalarynda óner kórsetken. Qazaqstan jastar quramasy sapynda 11 oıyn ótkizdi.
Eske sala keteıik, budan buryn «Aqjaıyq» fýtbol klýbyna jańa dırektor taǵaıyndalǵanyn jazǵan bolatynbyz.
