Fýtbol: Oraldyń «Aqjaıyǵy» besinshi ret qatarynan jeńiske qol jetkizdi
ORAL. QazAqparat - Fýtboldan el birinshiliginiń 7-12-inshi oryndar úshin ótip jatqan oıyndardy Oraldyń «Aqjaıyǵy» ázirge óte sátti ótkizýde.
Sports.kz saıtynan alynǵan málimetke qaraǵanda, kezekti týrda oraldyqtar Atyraýda jergilikti komandany 2:1 esebimen tize búktirdi. Birinshi taımda alań ıelerinen rýmynııalyq jartylaı qorǵaýshy Aleksandrý-Paýl Kýrteıan qonaqtardyń qateligin sátti paıdalanyp, esep ashty.
Matchtyń ekinshi kezeńinde «Aqjaıyq» quramyndaǵy ýkraınalyq shabýylshy Konstantın Dýdchenko qos doptyń avtory atanyp, óz komandasyna jeńis áperdi. Aldymen ol 61-mınýtta «Atyraýdyń» qaqpashysy Jasýr Narzıkýlovtyń sátsiz qaıtarǵan dobynan keıin tarazy basyn teńestirdi. Al 78-mınýtta paragvaılyq legıoner Freddı Koronel Ortızdiń dál pasynan soń qaqpashymen jekedara shyqqan K.Dýdchenko óz múmkindigin qalt jibergen joq.
Kezdesýden keıingi baspasóz máslıhatynda oraldyqtardyń bas bapkeri Vahıd Masýdov birinshi taımda úsh-tórt múmkindikti paıdalanbaı, qorǵanysta qatelikke boı aldyrǵan shákirtteri ekinshi kezeńde belsendi oınap, sheshýshi sátterde sheberlik tanyta bilgendigin atap kórsetti.
Sóıtip «Aqjaıyq» osymen qatarynan besinshi jeńisine qol jetkizip, qazirgi tańda 26 upaımen «Tarazdyń» (25 upaı) aldyna túsip, 11-inshi orynǵa kóterildi. 27 upaılary bar «Jetisý» men «Shahterge» de quıryq tistesip qaldy. Degenmen tarazdyqtar búgin Qostanaıda «Tobylmen» sheberlik baıqasady. Sondaı-aq Taldyqorǵanda «Jetisý» Qaraǵandynyń «Shahterin», al Aqtóbede jergilikti komanda el chempıony «Astanany» qabyldaıdy. Keshe óz alańynda Pavlodardyń «Ertisin» 2:1 esebimen tize búktirgen Almatynyń «Qaıraty» 58 upaımen kósh basyndaǵy, eki oıyny kem astanalyqtarǵa (59 upaı) jaqyndaı tústi. Al Shymkentte Kókshetaýdyń «Oqjetpesin» 1:0 esebimen qapy qaldyrǵan «Ordabasy» 43 upaımen týrnır kestesinde úshinshi orynǵa shyqty.
Aıta keteıik, «Aqjaıyq» kelesi oıynyn 24 qyrkúıek kúni óz alańynda «Shahtermen» ótkizedi.
