Fýtbol: Oraldyń «Aqjaıyǵy» «Aqtóbege» ese jiberdi
NUR-SULTAN. QazAqparat – Fýtboldan Qazaqstan chempıonatynyń 19-týrynda «Aqtóbe» óz alańynda Oraldyń «Aqjaıyǵyn» qabyldady, dep habarlaıdy QazAqparat tilshisi.
Týrnır kestesinde aqtóbelikter onynshy satyda tursa, oraldyqtar tórtinshi orynda kele jatqan edi.
«Aqjaıyq» sapynda túrli sebepterge baılanysty birneshe oıynshysy alańǵa shyǵa alǵan joq. Degenmen birinshi taım sońyna taman osyǵan deıingi matchtarda nátıjeli pastarymen kózge túsip júrgen reseılik jartylaı qorǵaýshy Evgenıı Kozlov esep ashty.
Ekinshi taımda aqtóbelik 19 jastaǵy Maksım Samorodov qos goldyń avtory atanyp, komandasyna jeńis syılady – 2:1.
Bul týrdan keıin ýkraınalyq maman Vladımır Mazıar jattyqtyratyn «Aqjaıyq» 28 upaımen ázirge tórtinshi ornynda qaldy. Al qazaqstandyq maman, kezinde oraldyq klýbtyń da tizginin ustaǵan Vahıd Masýdov baptaıtyn aqtóbelikter 23 upaımen toǵyzynshy orynǵa kóterildi.
Oraldyqtar kelesi kezdesýin 11 qyrkúıekte birinshilikte qaıtadan kósh bastaǵan «Astanamen» ótkizedi.
Eske sala keteıik, budan buryn Oraldyń «Aqjaıyǵyna» jańadan oıynshylar alynǵanyn jazǵan bolatynbyz.
Foto: Aıbatyr Nurash
