Fýtbol: Oralda «Jaıyq» pen «Turan» komandalary teń tarqasty
ORAL. KAZINFORM — Fýtboldan birinshi lıga komandalary arasynda Qazaqstan chempıonatynyń 24-týrynda «Jaıyq» óz alańynda Túrkistannyń «Turan» komandasyn qabyldady.
Birinshi lıgada qaraǵandylyq «Shahter» klýby premer-lıga joldamasyna merziminen buryn ıe bolǵan edi. Osy týr barysynda qaraǵandylyqtar óz alańynda Shymkenttiń «Akademııa Ońtústik» komandasyn 2:0 esebimen jeńdi. Bul kezdesýden keıin «Turannyń» da premer-lıgaǵa shyqqany belgili boldy. Óıtkeni shymkenttikter qalǵan eki týrda jeńiske jetse de, túrkistandyqtardy qýyp jete almaıdy.
«Jaıyq» 31 upaımen týrnır kestesinde 6-orynda kele jatqan edi.
Birinshi aınalymda Túrkistanda «Turan» men oraldyq maman Vıacheslav Nevolnıkov jattyqtyratyn «Jaıyq» 2:2 esebimen teń tarqasqan edi.
Bul joly birinshi taımda oraldyqtardan 18 jastaǵy Dıdar Danııalov óz qaqpasyna gol soǵyp aldy. Degenmen taım sońynda 11 metrlik núkteden múlt ketpegen Temirlan Úmbetov tarazy basyn teńestirdi — 1:1. Bul T.Úmbetovtiń osy maýsymdaǵy tórtinshi goly edi.
Ekinshi taımda qonaqtar kóbirek shabýyldap, alań ıeleriniń qaqpasyna qaýip tóndirdi. «Jaıyqtyń» qaqpashysy Ildar Meńdiǵalıev birneshe ret sátti oınady. Match sońyna taman «Turannyń» qaqpashysy Nıkıta Kalmykov ta komandasyn goldan qutqardy. Aqyry teń nátıje tirkeldi.
15 qazanda ótetin 25-týrda «Turan» Túrkistanda «Shahterdi» qabyldasa, «Jaıyq» syrt alańda «Tobyl jastarymen» kezdesedi.
Eske sala keteıik, budan buryn birinshi lıgada «Jaıyqtyń» syrt alańda «Turanmen» teń oınaǵanyn jazǵan edik. Sondaı-aq birinshi lıgada «Jaıyq» óz alańynda «Tarazdy» tize búktirdi.
