Fýtbol: Oralda «Aqjaıyq» pen «Atyraý» teń oınady
ORAL. QazAqparat - Búgin fýtboldan el birinshiliginiń toǵyzynshy týrynda «Aqjaıyq» P.Atoıan atyndaǵy stadıonda «Atyraýdy» qabyldady, dep habarlaıdy QazAqparat tilshisi.
Osyǵan deıingi matchtaryn Aqsaı qalasyndaǵy «Qarashyǵanaq» stadıonynda ótkizip kelgen batysqazaqstandyqtardyń bul Oraldaǵy alǵashqy oıyny edi.
Kezdesý alań ıeleri úshin sátsiz bastaldy. 10-mınýtta Babatýnde Adenıdjeniń pasynan keıin oń qanatta jalǵyz qalǵan Eldar Ábdirahmanov esep ashty.
Degenmen bul golǵa asa qýana qoımady. Óıtkeni Oralda fýtbol álippesin úırengen Eldar burynǵy óz komandasyna gol soqqan edi.
Budan keıin «Aqjaıyqtyń» bapkerleri oń qanatta oıqastaǵan E.Ábdirahmanovty «tusaýlaı almaǵan» Erkebulan Nurǵalıevtiń ornyna Oral fýtbolynyń taǵy bir túlegi Baýyrjan Omarovty shyǵardy.
Birinshi taımda oraldyqtardyń esepti teńestiretindeı múmkindikteri boldy. Ásirese, ýkraınalyq shabýylshy Aderınsola Habıb Eseolanyń pasynan keıin qaqpa bos qalǵan sátte Ivan Antıpov dopqa aıaǵyn tıgize almady. Endi birde Eseolanyń tepken doby qaqpadan tys ketti.
Ekinshi taımda I.Antıpovtyń ókshemen bergen ádemi dobyn Eseola tepkenimen, ony «Atyraýdyń» qaqpashysy Andreı Pasechenko qaqshyp ala bildi. 64-mınýtta buryshtamadan ýkraınalyq jartylaı qorǵaýshy Igor Hýdobıaktyń bergen dobyn Azat Ersálimov aıyp alańyna tastady. Bul joly Eseola baspen qaqpa buryshyn dál kózdedi.
Oıynnyń 67-mınýtynda Azat Ersálimovke qarsy dóreki oınaǵan atyraýlyq Rýslan Esatov alańnan qýyldy. Biraq bul basymdyqty «Aqjaıyq» paıdalana almaı, kezdesý 1:1 esebimen teń aıaqtaldy.
Aıta keteıik, Vladımır Mazıardyń shákirtteri bıylǵy maýsymda osymen tórtinshi ret 1:1 esebimen teń oınady. Bul týrdan keıin 10 upaıy bar «Aqjaıyq» týrnır kestesinde burynǵysynsha altynshy orynda keledi. Al jeti upaıy bar «Atyraý» ázirge onynshy satyda tur.
13 mamyr kúni ótetin kelesi týrda «Aqjaıyq» Aqtóbede jergilikti komandamen kúsh synassa, atyraýlyqtar óz alańynda el chempıony «Astanany» qabyldaıdy.
