Fýtbol: Oman quramasymen ótetin joldastyq kezdesýge daıyndyǵymyz oıdaǵydaı - Bernd Shtork
ALMATY. Tamyzdyń 5-i. QazAqparat /Erbol Turymbetov/ - Tamyzdyń 11-ine josparlanǵan fýtboldan Oman ulttyq quramasymen ótetin joldastyq kezdesýge Qazaqstan ulttyq quramasy daıyndyq jumystaryn oıdaǵydaı júrgizýde,
dep habarlaıdy QazAqparat.
Qazir elimizdiń fýtbolshylary oqý-jattyǵý jıyndaryn Almaty oblysynyń Talǵar aýdanyndaǵy bazada ótkizip jatyr. Budan buryn belgili bolǵandaı, ulttyq quramamyz Ekvador komandasymen oıyn ótkizýi kerek bolatyn. Biraq bul eldiń aıaqdopshylary áleýmettik jaǵdaılaryna baılanysty kezdesýden bas tartty. Osydan soń elimizdiń Fýtbol federatsııasy joldastyq kezdesý ótkizýge Oman quramasyna usynys jasaǵan bolatyn.
«Joldastyq kezdesýge daıyndyq jumystaryn oıdaǵydaı júrgizýdemiz. Ol úshin munda barlyq jaǵdaı jasalǵan. «Aqtóbe» komandasynyń sońǵy oıyndaǵy jeńilisinen keıin keıbir qurama músheleri áli tolyq babyna kele almady. Degenmen, Omanman bolatyn oıynda jaqsy óner kórsetýge tyrysamyz», dedi ulttyq quramanyń bas bapkeri Bernd Shtork.
Oman quramasy álem birinshiliginiń irikteý týrlarynda upaı sany boıynsha Avstralııa komandasynan keıin qalyp, fınaldyq kezeńge shyǵa almaǵan edi. Al jaqynda bolǵan Brazılııamen oıynda 0:2 esebimen utylsa, óz alańyndaǵy sońǵy oıynda 0:1 esebimen shvedterge jol bergen bolatyn.
