Fýtbol: Olıver Peltser 17 jasqa deıingi jasóspirimder quramasynyń aǵa jattyqtyrýshysy bolyp taǵaıyndaldy
ALMATY. 14 aqpan. QazAqparat /Erlik Erjanuly/ - Fýtboldan 17 jasqa deıingi jasóspirimder quramasynyń tizginin ustaǵan otandyq mamandar úmitti aqtamady.
Sol sebepti Qazaqstan Fýtbol federatsııasy sheteldik jattyqtyýshylardyń kómegine júginýdi qajet dep taýyp otyr. Ony QFF-nyń vıtse-prezıdenti Vıktor Katkov búgin Almatyda 17 jasqa deıingi jasóspirimder quramasynyń aǵa jattyqtyrýshysy bolyp taǵaıyndalǵan Germanııa azamaty Olıver Peltserdi jýrnalıstermen tanystyrý kezinde aıtty.
1969 jyly dúnıege kelgen O.Peltser bapkerlik PRO lıtsenzııasyn 2002 jyly ıelengen bolatyn. Jattyqtyrýshylyq mansabyn 1990-1992 jyldary "Haýzen" fýtbol klýbynda 18 jasqa deıingi jastardyń bas jattyqtyrýshysy bop bastady. Odan keıin "Bavarııada" 16 jasqa deıingi jasóspirimder komandasynyń tizginin ustady. 2000-2006 jyldary Bavarııa fýtbol federatsııasynyń 14-18 jasqa deıingi quramalarynyń suryptaýshy-jattyqtyrýshysy, 20 jasqa deıingi jastar quramasy Bas bapkeriniń assıstenti. 2006-2008 jyldary BAÁ-niń "Ál-Jazıra" klýbynda 16 jasqa deıingi jasóspirimder komandasynyń bas bapkeri. 2008-2009 jyldary Ázirbaıjannyń 15 jasqa deıingi jasóspirimder quramasynyń bas jattyqtyrýshysy, Bapkerlerdi oqytý ortalyǵynyń dırektory, al 2009-2010 jyldary 15 jáne 17 jasqa deıingi Ázirbaıjan quramasynyń bas jattyqtyrýshysy bolyp jumys jasady.
"17 jas - óte mańyzdy jas. Jasóspirimdik shaqtan jastyqqa aýysatyn ótpeli kezeńde bizge sheteldik maman qajet. Olıver Peltserdiń 19 jyldyq bapkerlik tájirıbesi bar. Onyń 15-i túrli jastar quramasynda ótken", -deıdi Vıktor Katkov.
