FÝTBOL: «Oqjetpes» premer-lıgada, «Aqjaıyq» úmitin úzdi
ORAL. QazAqparat - Jeksenbi kúni fýtboldan birinshi lıga klýbtary arasynda el chempıonatynyń kezekti týrynda premer-lıgaǵa joldama alǵan komanda anyqtady.
Kókshetaýdyń «Oqjetpesi» syrt alańda kósh sońynda kele jatqan «Maqtaaraldy» kútkendegideı, 2:0 esebimen utyp (qos goldy da soqqan Álibek Bóleshev), sońǵy týrdyń nátıjesine qaramastan, joǵary topqa beriler joldamany enshiledi. Al birinshi lıgada ekinshi oryn alǵan klýb premer-lıgada on birinshi satyǵa turaqtaǵan komandamen qosymsha oıynda kúsh synasady. Osyǵan deıin ekinshi orynnan tórt birdeı komanda úmitker bolatyn. Solardyń ekeýi Oralda jasyl alańǵa shyqty. Jergilikti «Aqjaıyq» elordanyń «Astana-1964» komandasyna 0:1 esebimen jol berip, premer-lıgadan birjola úmitin úzdi. Bul oıynda qarsy shabýylǵa shyǵý tásilin ońtaıly paıdalanǵan astanalyqtardan qorǵaýshy Evgenıı Panaşenko 43-mınýtta gol soǵyp ketti. Іle-shala alań ıeleriniń shabýylshysy Alekseı Maltsevtiń qaqpashymen jekedara shyǵyp, soqqan dobyn tóreshi oıynnan tys qaldy degen sebeppen eseptemeı tastady. Budan keıin «Aqjaıyq» qanshama tyrysqanmen, qonaqtar qamaly aldyrmady. Sóıtip batysqazaqstandyqtar bıyl alǵa qoıǵan maqsat údesinen shyǵa almady. Maýsymdy súreńsiz bastaǵan «Aqjaıyqtyń» tizginin keıin Sergeı Volgın qolyna alyp, komanda oıynyna biraz ózgeris engizgenimen, kósh basyndaǵylar aqyry jetkizbedi.
Óz alańynda Óskemenniń «Vostogyn» 3:2 esebimen tize búktirgen Shymkenttiń «Qyrany» 57 upaımen ekinshi orynda keledi. «Astana-1964» komandasy men Aqtaýdyń «Kaspııi» 55 upaı jınaǵanymen, dop aıyrmasy jaǵynan elordalyqtar alda tur. ıAǵnı 8 qarashada ótetin sońǵy týrda «Astana-1964» óz alańynda «Qyrandy» utsa boldy, ekinshi orynǵa kóteriledi. Shymkenttikterge teń oıyn nátıjesi jarap jatyr. Al premer-lıga joldamasyn qazirdiń ózinde ıelenip qoıǵan «Oqjetpes» Kókshede «Kaspııdi» synap kórmek.
