Fýtbol: «Oqjetpes» Oralda oısyraı jeńilgennen keıin premer-lıga joldamasy úshin báseke shıelenise tústi
ORAL. QazAqparat - Birinshi lıga komandalary arasynda fýtboldan Qazaqstan chempıonatynyń kezekti týryndaǵy ortalyq kezdesýde Oraldyń «Aqjaıyǵy» Kókshetaýdyń «Oqjetpesin» oısyrata utty.
Alań ıeleri birinshi lıgada kósh bastap kele jatqan komandanyń qaqpasyna ekinshi taımda tórt birdeı gol toǵytty. Áýeli slovenııalyq legıoner Borýt Semler bıylǵy maýsymdaǵy toǵyzynshy dobyn soqty. Sodan keıin kóp uzamaı «Aqjaıyq» on mınýttyń ishinde «Oqjetpestiń» qaqpasyna úsh gol engizip, esepti 4:0-ge jetkizdi. Komandanyń jas shabýylshysy Ivan Antıpov, sondaı-aq bosnııalyq Mahır Karıch, tájirıbeli qorǵaýshy Baýyrjan Omarov mergendigimen kózge túsip, stadıon toly jankúıerdi qýantty.
Osy týrdan keıin «Oqjetpes» 55 upaımen burynǵysha birinshi orynda tursa, premer-lıga joldamasynan qalǵan úmitkerler de ony ókshelep keledi.
«Qyran» 54 upaımen ekinshi, Aqtaýdyń «Kaspııi» men «Aqjaıyq» (51 upaı) úshinshi-tórtinshi orynda kele jatsa, elordanyń «Astana-1964» komandasy (49 upaı) da áli úmitin úze qoıǵan joq. 25 qazanda ótetin kelesi týrda Kókshede «Oqjetpes» pen «Qyrannyń», Óskemende «Vostok» pen «Aqjaıyqtyń», Ekibastuzda jergilikti komanda men «Kaspııdiń» kezdesýleri tartysty bolmaq. Birinshi lıga komandalary arasyndaǵy chempıonattyń aıaqtalýyna úsh-aq týr ǵana qaldy.
