Fýtbol: Nuráli Álip Reseıdiń «Zenıt» komandasyna aýysty
NUR-SULTAN. QazAqparat - Qazaqstandyq fýtbolshy Nuráli Álip Reseıdiń «Zenıt» komandasynyń oıynshysy atandy, dep habarlaıdy QazAqparat tilshisi.
Bul jóninde reseılik klýbtyń baspasóz qyzmeti málim etti.
Nuráli Paktuly Álip 1999 jyldyń 22 jeltoqsanynda Aqtaý qalasynda dúnıege kelgen. Segiz jasynda jergilikti «Kaspıı» komandasynda fýtboldyń alǵashqy álippesin ashty.
2015 jyldan bastap «Kaırat» akademııasyna aýysyp, úsh jyldan keıin almatylyq klýbtyń negizgi quramynda tusaýkeser oıynyn ótkizdi.
Qazirge deıin ol «Qaırat» quramynda 99 oıyn ótkizgen. Nátıjesinde qarsylastar qaqpasyna bes gol soǵyp, áriptesterine tórt nátıjeli pas berdi. Komanda quramynda el chempıony ataǵyna ıe bolyp, eki márte Qazaqstan kýbogyna qol jetkizdi.
Ulttyq qurama sapynda 12 oıyn ótkizip úlgerdi.
Bıylǵy jyldyń qańtarynda «Zenıttiń» oqý-jattyǵý jıynyna shaqyrtý aldy. Atlantic Cup kýbogynda Danııanyń «Mıdtıýlland» jáne «Brondbıý» komandalary qaqpasyna eki gol soqty. Ol óziniń jańa klýbynda 28 nómirli jeıdede oıyn kórsetedi.
Eske salsaq, budan buryn fýtboldan el birinshiligi 5 naýryzda bastalatyny habarlandy.
