Fýtbol merekesi - elordada
ASTANA. QazAqparat - Elorda kúnin merekeleý aıasynda Q. Muńaıtpasov atyndaǵy stadıonda fýtbol festıvali ashyldy, dep habarlady qala ákiminiń resmı saıty
Alǵashqy jarys kúni Mektep lıgasynyń aqtyq jarystary ótti. 2003-2004 j.t. balalar arasynda №3 mektep-gımnazııasynyń oqýshylary, al 2005-2006 j.t. arasynda №60 mektep-lıtseıiniń komandasy jeńiske jetti.
Sonymen qatar, qyzdar arasynda №4 mektep-gımnazııasy top jardy. Búgin mereke jalǵasyn tabady. Alańda memlekettik qurylymdardyń qyzmetkerleri sheberlik baıqasady.
Shaǵyn fýtboldan ótetin týrnırge mınıstrlikter men elordalyq basqarmalardan memlekettik qyzmetshilerdiń 23 komandasy qatysady. Oıynshylar alty topqa bólindi, jarys eki kezeńmen ótedi - toptyq jáne fınaldyq.
- Apta boıy jumys istegennen keıin demalys kúnderi alańǵa shyǵyp oınaý qajet. Osyndaı týrnırlerdi jıirek ótkizý kerek. Sonda memlekettik qyzmetshilerdiń kóńil kúıi jaqsarady. Menińshe, kez kelgen uıymda sportqa kóńil bólinýi kerek, - dedi Astana qalasy boıynsha memlekettik kirister departamentiniń qyzmetkeri Ádil Shanabaev.
Aıta keteıik, festıval aıasynda Astana qalasy kýbogynyń fınaly ótti. Jyl saıynǵy týrnır 16 jyldan beri ótkizilip keledi. Alańda elorda birinshiligine qatysqan «Zenıt» jáne «Shkolnık» komandalary kezdesti.
Búgin Astana men Aqmola oblysynyń balalar úıleriniń tárbıelenýshileri ózara kúsh synasady. Jarysqa 7 komanda qatysady dep kútilýde. Olar da eki topqa bólinip oınaıdy.
- Qala kúnin merekeleý aıasynda azamattardyń barlyq sanatyn qamtýǵa tyrysamyz. Osylaısha, Astana Kýbogy fınalynda áýesqoılardan kásipqoı sanatyna ótetin balalar oınady. Jarysqa oıynshylar tartyldy, jalpy, Mektep lıgasyna qalanyń jalpy bilim beretin mektepterinen 85 komanda qatysty. Sharaǵa balalar úıiniń de tárbıelenýshileri qatysyp jatyr. Memlekettik qyzmetshiler de bar. Shara osyndaı formatta alǵash ret ótkizilip jatyr, - dedi Astana qalasy Fýtbol federatsııasynyń menedjeri Ǵalymjan Kenjalınov.
