Fýtbol merekesi bastalady: álem chempıonatynyń ashylýyn qaıdan kórýge bolady
ASTANA. KAZINFORM — Búgin, 11 maýsymda, fýtboldan 23-shi álem chempıonatynyń shymyldyǵy túriledi. Kazinform tilshisi jankúıerlerdi qandaı qyzyqtar kútip turǵanyn baıandap berdi.
2026 jylǵy álem chempıonatynyń ashylý saltanaty Mehıko qalasynda ótip, alǵashqy matchtyń bastalýyna 90 mınýt qalǵanda kórermenge jol tartady.
FIFA uıymdastyrǵan aýqymdy mýzykalyq shoýdyń kórkemdik qoıylymyna Olımpıada oıyndarynyń saltanattaryn sahnalaǵan Marko Balıch jaýapty. Meksıkadaǵy shoýdyń negizgi tujyrymdamasy jergilikti dástúrli papel picado (órnekti qaǵaz) óneri men ulttyq folklordan shabyt alǵan.
Týrnırdiń resmı ánurany — DNA kompozıtsııasyn ıtalııalyq opera ánshisi Andrea Bochellı, frantsýz dıdjeıi Davıd Getta, amerıkalyq reper Megan Thee Stallion jáne ánshi EJAE jandy daýysta oryndaıdy.
Sondaı-aq Shakıra men nıgerııalyq oryndaýshy Burna Boy álem chempıonatynyń resmı áni — Dai Dai týyndysyn alǵash ret kópshilikke usynady. Olarmen birge sahnada Ýgandanyń Ghetto Kids bı ujymy óner kórsetedi.
Latynamerıkalyq mádenıettiń jarqyn kórinisi retinde meksıkalyq áıgili Maná rok-toby, ánshiler J Balvin, Danny Ocean, Belında, Alehandro Fernandes, Lıla Daýns jáne Los Ángeles Azules toby sahnaǵa shyǵady. Al ońtústikafrıkalyq ánshi Tyla óz eliniń memlekettik ánuranyn oryndaıdy.
Merekelik keshti Gollıvýd juldyzy Salma Haıek ashyp, jankúıerlerge arnaýly quttyqtaý joldaıdy.
Qazaqstan ýaqyty boıynsha 12 maýsym túngi saǵat 00:00–de Mehıkoda álem chempıonatynyń alǵashqy matchy bastalady.
Qazaqstan aýmaǵynda týrnır oıyndary Qazsport jáne Qazaqstan telearnalarynan tikeleı efırde kórsetiledi. Kezdesýlerdiń basym bóligi elimizde túngi nemese tańǵy ýaqytta ótedi.
Álem chempıonatynyń alǵashqy oıynynda Meksıka men Ońtústik Afrıka Respýblıkasy quramalary kezdesedi. Bul 2010 jylǵy álem chempıonatynyń ashylý matchynyń qaıtalanýy bolmaq. Ol kezde komandalar 1:1 esebimen teń túsken edi. Al áıgili «Atsteka» stadıony tarıhta úshinshi ret álem chempıonatyn qabyldaǵan alǵashqy arena atanady.
Alǵashqy oıyn kúni Ońtústik Koreıa men Chehııa quramalarynyń matchymen aıaqtalady. Kezdesý Meksıkanyń Gvadalahara qalasyndaǵy (Sapopan) «Akron» (Estadio Akron) stadıonynda ótedi. Qazaqstan ýaqyty boıynsha oıyn 12 maýsym kúni tańǵy saǵat 07:00-de bastalady.
2026 jylǵy fýtboldan álem chempıonaty: Qazaqstandaǵy alǵashqy oıyn kúniniń translıatsııa kestesi
11 maýsym
-
22:30 — Álem chempıonatynyń ashylý saltanaty (Mehıko, «Atsteka» stadıony)
12 maýsym
-
00:00 — Meksıka — OAR
-
07:00 — Ońtústik Koreıa — Chehııa
Budan buryn Sýperkompıýter fýtboldan 2026 jylǵy Álem chempıonatynyń basty favorıtin atady.
