Fýtbol maýsymynyń kezekti tartystary
ASTANA. QazAqparat - Búgingi tańda el ishindegi birinshilik aıaqtalsa da, fýtbol oıynyn súıip kóretinder úshin ala dop dýmany kári qurlyqta qyzyp jatyr. Atap aıtqanda, qazaqstandyq sport jankúıerleri álemdik juldyzdy klýbtardyń da oıyndaryn telearnadan tikeleı kórý múmkindigine ıe bolyp otyr. Ásirese, «Qazsport» telearnasy árbir senbi-jeksenbi kúnderi fýtboldan ótetin tartysty kezdesýlerdi kórsetip, kórermenderin qýantyp keledi. Dop tepken sheberlerdiń ónerine tánti bolatyndardyń nazary qyzyqty matchtarǵa aýysqan edi. Sheteldik lıgalardyń eń mańyzdy matchtaryna sholý jasasaq.
Úzdikter gol soqpady
Osy aptada FIFA 2016 jyldyń úzdik fýtbolshysyna úmitkerler arasynan úsheýin iriktep shyǵardy. Bul qatarǵa Krıshtıaný Ronaldý men Leonel Messı ádettegideı jaıǵassa, úshinshi bolyp Antýan Grızmann oryn tepti. Alaıda, úsheýi de senbilik fýtbol keshterinde gol soǵa almady.
Ronaldý men Messı El Klassıkoda kózge túse almasa, Grızmann komandasymen birge «Espanol» qaqpasynan sańylaý taba almady. Taǵy bir jaıt, Messı 2014 jyldyń naýryzynda «Real Madrıd» qaqpasyna het-trık jasaǵannan beri El Klassıko matchtarynda gol soǵa almaı júr. Statıstıkaǵa júginer bolsaq, Ronaldý «katalondyqtarǵa» qarsy 25 ret oınap 16 gol soqqan, al Leonel 32 oıynda 21 ret «Real» qaqpasyn dál kózdegen. Alaıda, osyndaı keremet kórsetkishter senbilik matchta baıqalmaǵandaı.
Birinshi taımda eki ujym da belsendi oınady. Barlyǵy birin-biri julmalaýmen qatar, tóreshi ysqyryǵyn ańdyp oınaǵandaı boldy. Match tóreshisi K.Gomes synǵa ushyraýdan saqtanyp, kezdesý barysyna aıtarlyqtaı ózgeris engizetin aıyp dobyn belgileýden aýlaq boldy. Esepti 53-shi mınýtta Lýıs Sýares ashty. «Real» shabýylyn kúsheıtkileri kelgenimen, katalondyqtar dopty óz yrqynan jibermeýdegi úlken sheberlikterin Kamp Noýǵa jınalǵan 99 myń kórermenge pash etti. Neımar men Messıdiń de bir-eki tamasha múmkindigi boldy, paıdalana almaı qaldy. «Real» oıynshylary jáne bapkeri Zınedın Zıdan «Barselonanyń» jeńbeıtinin aldyn ala bilip júrgendeı. Óıtkeni keı sátterde tek oıynshysyn almastyryp, shynymen de júrip alǵandaı boldy. Kezdesýdiń 90-shy mınýtynda kóterilgen dopqa basyn dál qoıa bilgen Serhıo Ramos esepti teńestirdi.
Sonymen «Barselona» mańyzdy matchta jeńisti ýysynan jiberip aldy. Bir qaraǵanda osy goldy Maskerano, Pıke, Alba atty qorǵaýshylary asyǵa kútken syqyldy. Sebebi fýtboldyń sońǵy ysqyryqqa deıin oınalatynyn jaqsy biletin olardyń Ramosty ustaýǵa álderi jetpek túgili, tyrysqandary da az sekildi kórindi. Naǵyz kapıtan Serhıo Ramos bolsa, kezdesýdiń juldyzyna aınaldy. «Realdy» sońǵy mınýttarda jeńilisten qutqarýdy jaqsy «ádetke» aınaldyrǵan ıspandyq qorǵaýshynyń arqasynda madrıdtik klýb ózderiniń jeńilissiz serııasyn 33 matchqa deıin jetkizip otyr.
Frantsııa quramasy jáne «Atletıko Madrıdtiń» shabýylshysy Antýan Grızmann da kózge túse almady. Álemniń eki úzdik fýtbolshysy bir-birine qarsy oınap, keremet oıyn kórsete almaǵanyn Antýan Grızmann paıdalaný kerek edi. Biraq Antýan da «Espanolǵa» qarsy matchta gol soǵa almady. Eki ujym kezdesýlerin 0:0 esebimen aıaqtaýǵa májbúr boldy.
Konte basqarǵan «Chelsıdi» toqtatý múmkin emes
Iá, dál solaı. Italıandyq bapkerdiń qolyn jan-jaqqa sermep, fýtbolshylaryna ornynda sekirip turyp aıǵaı salatyny Moýrınonikideı «nátıjesiz qubylysqa» aınalyp ketpese kerek. Ol aǵylshyn premer lıgasynda qatarynan sońǵy 8 oıynda jeńiske jetip, Abramovıch klýbyn lıder qyldy.
Aǵylshyn lıgasynyń 14-shi týry aıasyndaǵy basty kezdesý «Manchester sıtı» men «Chelsı» arasynda ótti. Chempıonat basynan beri osy lıganyń eń myqty bapkeri Hosep Gvardıola bolyp sanalǵandaı edi, endi barlyǵy ózgerdi. Antonıo Konte - eń myqty bapker. Ol «Chelsı» qorǵaýshysy Garı Kehılldiń kómegimen Gvardıola quraǵan «Manchester sıtıdiń» oınaý taktıkasyna qarsy amaldardy kezdesý barysynda sátti jáne utymdy engizip otyrdy. «Sıtı» birinshi bolyp esep ashty. Avtogoldyń oryn alǵanyna qaramastan, «Chelsı» oıynshylary «Manchester sıtı» qysymynan shyǵa bildi. Qarymta shaýbyldardyń arqasynda Klaýdıo Bravo qorǵaǵan qaqpaǵa Kosta, Vılıan jáne Azar jaýapsyz úsh gol soqty. Esep 1-3. Gvardıolaǵa tek ań-tań bolyp qalýdan basqa amal qalmady. Sońǵy mınýttarda Agýero men Fernandıno alańnan qýylyp ketti.
Antonıo Konte Abramovıchtiń klýbyna ótken jylǵy «Lester» jáne ózi bapkerlik jasaǵan Italııa quramasynyń taktıkalyq úlgilerin sińire alǵany baıqalady. Basty tásil - qarsylys qysymynan alysqa asyrylǵan pastar arqyly shyǵý, qarymta shabýyldy aıaqtaý shegine Kosta, Azar sııaqty myqtylardy ornalastyrý jáne qorǵaýshylar shebin tasqamalǵa aınaldyrý. Hosep Gvardıolany tize búktirgen Konte komandasy óte myqty ujymǵa aınalyp keledi.
Jáne taǵy basqa kezdesýlerge toqtalyp ótsek, londondyq derbıde «Vest Ham» «Arsenaldan» 1-5 esebimen oısyraı jeńildi. «Lıverpýl» syrt alańda 76 mınýtqa deıin «Bornmýtty» 1-3 esebimen utyp jatqan edi, sodan keıin 4-3 bolyp ese jiberdi. Ibragımovıch «Everton» qaqpasyna keremet gol soqty, biraq «Manchester ıÝnaıted» sońǵy ýaqyttarda teń túsýden talmaıtyn boldy. Osyǵan deıin «Arsenal», «Vest Hammen», endi mine «Evertonmen» 1-1 bolyp oıyndy aıaqtady. Shamasy bul 1-1 esebi «Manchester ıÝnaıtedtiń» bas bapkeri portýgaldyq Joze Moýrınoniń túsine jıi kiretin bolar.
«RB Leıptsıg» «Lester» jolyn qaıtalaı ala ma?
Leıptsıgta ornalasqan, 7 jyldyq qana tarıhy bar, ótken jyly ekinshi býndeslıgada 2-shi oryn alyp, basty býndeslıgaǵa aýysqan - «RB Leıptsıg» klýby týraly aıtar pikir kóp emes. Biraq olar 13 týrdan keıin birinshi orynda keledi. Ataǵy jer jaratyn «Bavarııa» onyń artynan qýyp jete almaýda. Óıtkeni bul sensatsııalyq klýb 13 kezdesýde jeńilis degendi kórmegen. Keremet kórsetkish! Azýly degen dortmýndyq «Borýssııany», «Baıerdi» jerge qaratqan «Leıptsıg» osy demalys kúnderi «Shalkeden» 2-1 esebimen basym tústi.
Eger «RB Leıptsıg» klýby osy qarqynynan taımasa, chempıonatty tamasha nátıjemen aıaqtaı alady. Múmkin ótken jyly aǵylshyn premer lıgasynda kútpegen jerden top jarǵan «Lester» sııaqty chempıon da bolyp qalar. Qazirgi tańda olar býndeslıgada birinshi, «Bavarııa» bolsa 30 upaı jınap, úsh upaıǵa qalyp keledi.
Al Frantsııa birinshiligine nazar salsaq, «Monpele» «PSJ-ny» 3-0 qylyp, oısyrata jeńdi.
Italııa chempıonatynda «ıÝventýs» senimdi túrde alda keledi. Ekinshi turǵan «Roma» 4 upaıǵa qalyp keledi.
Aıta ketý kerek, aldaǵy senbi-jeksenbi kúnderi de «Qazsport» telearnasy Eýropanyń úzdik klýbtarynyń tamasha oıyndaryn kórermender nazaryna usynbaqshy.
