FÝTBOL: Lıonel Messı tórtinshi ret «Altyn dop» ıegeri atandy
ASTANA. 8 qańtar. QazAqparat - Argentınalyq Lıonel Messı 2012 jyldyń úzdik fýtbolshysy atandy. Bul týraly shveıtsarııalyq Tsıýrıh qalasynda ótken saltanatty rásimde jarııalandy.
Halyqaralyq fýtbol qaýymdastyqtarynyń federatsııasy men «Frans fýtbol» jýrnalynyń birlesken syılyǵy bolyp tabylatyn «Altyn dop» úshin kúreste 25 jastaǵy shabýylshy «Barselona» boıynsha klýbtasy ıspanııalyq Andres Inesta men «Real» (Madrıd) atynan shyǵatyn portýgalııalyq Krıshtıaný Ronaldýdan ozdy.
Osylaısha, búginde argentınalyq fýtbolshy taǵy bir rekord jasady. Eger ótken jyly Messı kúntizbelik jyldyń ishinde 91 dop kirgizip, nemis Gerd Mıýllerdiń 40 jyl buryn jasaǵan rekordyn jańartsa, endi ol «Altyn dopty» qatarynan tórtinshi ret alyp otyr. Fýtbol tarıhynda osyndaı oqıǵa bolmaǵan edi.
Eske sala ketsek, syılyq búkil álemniń fýtbol jýrnalısteriniń, ulttyq quramalardyń jattyqtyrýshylary men kapıtandarynyń daýys berý qorytyndylarynyń negizinde taǵaıyndalady.
