Fýtbol: «Qyzyljar» men «Kaspıı» premer-lıgada, «Aqjaıyq» úshinshi orynda
ORAL. QazAqparat - Fýtboldan birinshi lıga komandalary arasynda el birinshiligi márege jetti, dep habarlaıdy QazAqparat tilshisi.
Chempıonat qorytyndysy boıynsha Petropavldyń «Qyzyljary» men Aqtaýdyń «Kaspııi» premer-lıgaǵa joldama aldy.
Sońǵy týrda «Qyzyljar» óz alańynda «Baıqońyrdy» 6:0 esebimen oısyrata utyp, 58 upaımen birinshi orynǵa ıe boldy. Syrt alańda «Shahter-Bolatty» 3:0 esebimen tizerletken «Kaspıı» 56 upaımen ekinshi orynǵa shyqty.
Oraldyń «Aqjaıyǵy» P.Atoıan atyndaǵy stadıonda «Astana M» komandasyn qabyldap, 5:1 esebimen jeńiske jetti. Munda alań ıelerinen brazılııalyq legıoner Mello Djakomo qos goldyń avtory atansa, Erbolat Rústemov, Maksım Lıtvınov jáne Vladımır Pokatılov bir-bir doptan soqty.
Shyǵysqazaqstandyq «Altaıdyń» Ekibastuzda jergilikti klýbpen teń oınaýy «Aqjaıyqqa» 55 upaımen úzdik úshtikti túıindeýge múmkindik berdi.
Endi oraldyq maman Artýr Avakıantstyń shákirtteri 15 jáne 18 qarasha kúnderi premer-lıgada onynshy oryn alǵan komandamen taǵy bir joldamany sarapqa salady.
