Fýtbol: Kósh basyndaǵy komandalar oısyraı utyldy
ASTANA. 27 mamyr. QazAqparat - Keshe, 26 mamyrda fýtboldan Premer-lıga komandalary arasynda Qazaqstan chempıonatynyń 13-shi týr oıyndary ótti.
Bul týrda kósh basyndaǵy komandalar syrt alańda oınap, qarsylastarynan iri eseptermen utylyp qaldy. Máselen, Astananyń «Lokomotıv» komandasy Pavlodarda «Ertiske» 0:5 esebimen oısyraı jeńildi. Al «Aqtóbe» bolsa Almatyda 0:3 esebimen «Qaırat» komandasyna ese jiberdi.
Bul týrdaǵy qalǵan oıyndardyń nátıjeleri mynadaı: «Vostok»-«Shahter» 1:2, «Atyraý»-«Ordabasy» 1:1, «Tobyl»-«Jetisý» 1:0, «Qaısar»-«Taraz» 1:0.
13-shi týrdan keıin 27 upaı jınaǵan «Lokomotıv» birinshi orynda keledi. Ekinshi jáne úshinshi oryndarda 26 upaılary bar «Aqtóbe» men «Shahter» tur. Úzdik bestiktiń qatarynda, sonymen qatar, «Jetisý» men «Ertis» komandalary keledi. Mergender kóshin qarsylastarynyń qaqpasyna 8 dop toǵytqan «aqtóbelik» Marat Haırýllın bastap tur. «Shahter» oıynshysy Sergeı Hıjnıchenko 7 doppen ekinshi orynda. «Aqtóbe» klýbynyń taǵy bir oıynshysy Malık Mane 6 gol soǵyp, úzdik úshtiktiń qatarynda tur. 14-shi týrdyń matchtary 8 maýsymda ótedi.
