Fýtbol: qos sheteldik oıynshy «Aqjaıyqta» qaldy
ORAL. QazAqparat - Horvatııalyq Denıs Glavına men ýkraınalyq Sergeı Basov jańa maýsymda «Aqjaıyq» komandasynda óner kórsetedi, dep habarlaıdy QazAqparat tilshisi.
«Aqjaıyq» fýtbol klýbynyń baspasóz qyzmetinen túsken málimetke qaraǵanda, qos oıynshymen de kelisimshart uzartylǵan.
Denıs Glavına sporttyq jolyn Zagrebtiń «Dınamo» klýbynda bastady. Keıin ýkraınalyq «Dınamo» (Kıev), «Dnepr» (Dnepropetrovsk), «Vorskla» (Poltava), polshalyq «Arka» (Gdynıa), horvatııalyq «Varajdın», «Splıt» jáne slovenııalyq «Zavrch» komandalarynda dop tepti.
Qazaqstanǵa 2016-2017 jylǵy maýsymda kelip, áýeli «Tobylda» oınap, sosyn «Aqjaıyqqa» qosyldy. Ótken jylǵy maýsymnyń jartysyn «Jetisý» sapynda ótkizip, jazda Oralǵa oraldy.
2018 jyly komanda kóshbasshylarynyń biri bolǵan Sergeı Basov Ýkraına chempıonatynda ár jyldary Zaporojeniń «Torpedo», «Dınamo», «Metallýrg» komandalarynda oınady. Sondaı-aq «Tıtan» (Donetsk), «Zvezda» (Kırovograd), «Býkovına» (Chernovtsy) jáne «Aleksandrııa» (Aleksandrııa) klýbtarynda óner kórsetti. «Aqjaıyqqa» ótken jyldyń qańtarynda keldi.
Osylaısha qos tájirıbeli qorǵaýshy «Aqjaıyqtyń» premer-lıgaǵa qaıta oralýyna kúsh salmaqshy.
Qazirgi kezde ýkraınalyq maman Sergeı Zaıtsev jattyqtyratyn oraldyq klýb Túrkııada ekinshi oqý-jattyǵý jıynyn ótkizýde. Onda oıynshylardy synap kórýmen birge birneshe komandamen joldastyq kezdesý josparlanǵan.
Eske sala keteıik, budan buryn «Aqjaıyq» úsh oıynshymen kelisimshartty uzartyp, taǵy bir fýtbolshyny jańadan alǵan bolatyn.
