Fýtbol klýbtaryn memleketten qarjylandyrýdy toqtatý qajet - Qazybek Isa
«Úsh kún buryn fýtboldan álem chempıonatyna irikteýde Qazaqstan komandasynyń Frantsııadan 8:0 bolyp, fýtbol tarıhyndaǵy masqara eseppen jeńilýi eldiń qatty narazylyǵyn týdyrýda. Baspasózde aımaqtardaǵy fýtbol klýbtaryna 71 mlrd teńge jumsalǵany, tek «Astana» klýbynyń ózine 15 mlrd teńge bólingeni jarysa jazylýda. Biraq nátıje qaıda?! «Fýtbol federatsııasynyń bas hatshysy biz bıýdjetten qarajat almaımyz, 200 mln teńge ǵana aldyq» dep jaýap berdi. Al jeńilistiń sebebi jaqsy fýtbolshylardyń tapshylyǵy deıdi. Federatsııa bıýdjetten kóp qarjy almaımyz deıdi, biraq mıllıardtardy osy federatsııaǵa kiretin kásipqoı klýbtar oblys ákimdikteri arqyly alýda», - dep toqtaldy Q. Isa Úkimet basshysynyń orynbasary Eraly Toǵjanovtyń atyna joldaǵan saýalynda.
Depýtattyń aıtýynsha, sońǵy úsh jyldaǵy oblystyq ákimdikterdiń kásibı klýbtarǵa bólgen qarjysynyń ózi az emes, 111,2 mlrd teńge. Al federatsııaǵa respýblıkalyq bıýdjetten, ÝEFA-dan, «Samuryq-Qazynadan», demeýshiler bergen qarjyny qosqanda, onyń esebi joq. Óıtkeni resmı málimet berilmegen. Jaqsy fýtbolshylardyń tapshy bolatyny - óz fýtbolshylarymyzdy daıyndaýdyń ornyna mol aqshany sheteldikterge jumsap júrgenniń nátıjesi.
Osy oraıda ol legıonerlerge toqtala kele, halyq qazynasy qazaq fýtbolyn damytýǵa emes, shetel fýtbolshylaryn baıytýǵa jumsalyp jatqanyn atap ótti.
«Qazaqstan 30 jylda bir ǵana stadıon salsa, bizden fýtbol bıýdjeti eki ese az Ózbekstan 10 stadıon salǵan. FIFA reıtıngisi boıynsha Qazaqstan 125-orynda, al TMD boıynsha fýtbol bıýdjeti eń az Qyrǵyzstan 96-orynda. Brazılııaǵa «alaqaılap» jibergen 78 balaqaıdyń bir de bireýi qazir fýtbol oınamaıdy. Esepsiz mıllıardtardy dalaǵa shashamyz, biraq gol joq. Al aýyldarda qarjy tapshylyǵynan jol joq», - dedi Qazybek Isa.
Osy oraıda nátıje kórsetpeı kelgen fýtbolshylarǵa mıllıardtardy bosqa shashýdy toqtatý kerek ekeni aıtyldy.
Onyń sózine qaraǵanda, kásibı sport, ıaǵnı fýtbol bıznes bolyp otyr.
«Al álemde kásibı sport memlekettiń moınyna minip almaıdy. Sondyqtan fýtbol klýbtarynyń barlyǵyn jekeshelendirip, memleketten qarjylandyrýdy toqtatý qajet. Ekinshiden, memleket qarjysy balalar men jasóspirimder mektepterine, fýtbol mektepterin damytýǵa, balalar bapkerlerin daıyndaýǵa jumsalýy kerek. Aýyldaǵy talantty balalarǵa jaǵdaı jasaý qajet. Aýdandarda, qala mańynda tegin fýtbol alańdaryn salý kerek. Sektsııalardaǵy jattyqtyrýshylardyń jalaqysyn pedagogtarmen teń etken jón. Osy ýaqytqa deıin memleketten fýtbol salasyna bólingen qarjynyń esebi berilýi tıis, óıtkeni ol – halyqtyń qarjysy», - dedi depýtat.
