Fýtbol klýbtaryn jekeshelendirý jol kartasy ázirlenedi

ASTANA. KAZINFORM — Otandyq fýtbol klýbtaryn jekeshelendirý boıynsha keshendi jol kartasy ázirlenedi. Bul týraly Týrızm jáne sport mınıstrliginen málim etti.

QR Prezıdentiniń 2025 jylǵy 14 naýryzdaǵy Qazaqstan Respýblıkasy Prezıdenti janyndaǵy Ulttyq quryltaı otyrysynda bergen tapsyrmasyna sáıkes:

— Elimizdiń Premer-Lıgasynda 14 kásibı fýtbol klýby óner kórsetedi. Onyń ishinde 13 klýb (Astana, Tobyl, Aqtóbe, Turan, Elimaı, Atyraý, Oqjetpes, Jetisý, Jeńis, Qaısar, Ulytaý, Ordabasy, Qyzyl-Jar) jergilikti atqarýshy organdar tarapynan, al qalǵan 1 klýb (Qaırat) óz qarajaty esebinen qarjylandyrylady. Kommýnaldyq menshik nysandaryn básekelestik ortaǵa berý usynylǵan uıymdar tizimine Aqtóbe, Qyzylorda jáne Aqmola oblystarynyń fýtbol klýbtary («Aqtóbe», «Qaısar», «Oqjetpes») engizilgen, — dep atap ótedi Týrızm jáne sport mınıstrliginen agenttiktiń saýalyna oraı.

Sondaı-aq mınıstrlik jergilikti atqarýshy organdarǵa fýtbol klýbtaryn kommertsııalandyrý máselesi boıynsha aldyn ala suraý jiberilgenin atap ótedi. 

— Jergilikti organdarmen birlesip, álemdik tájirıbeni eskere otyryp, fýtbol klýbtaryn jekeshelendirý boıynsha keshendi jol kartasy ázirlenedi. Fýtbol klýbtary akademııalyq bazany nyǵaıtý, jarnama men translıatsııa, ónim satý arqyly tabys tabýǵa umtylýy tıis, — dedi vedomstvodan.

Aıta keteıik, osy jyldyń naýryzynda Býrabaıda ótken Ulttyq quryltaıdyń 4-otyrysynda Memleket basshysy fýtbol klýbtary oblystyq bıýdjetterge ǵana arqa súıemeı, shetelderdegi sekildi ózderi de tabys tabýdy úırenýi kerektigin aıtqan edi. 

— Sondyqtan men kásipkerlerdi klýbtyq fýtbolǵa bıznes retinde qaraýǵa shaqyramyn. Fýtbol klýbtary jekemenshikke ótpeı, is alǵa baspaıdy. Bul — álemdik tájirıbe. Klýbtar jekemenshik bolsa, shetel sportshylaryn shaqyrý quqyǵyna ıe bolady, — degen bolatyn Prezıdent.

Buǵan deıin elimizdiń qaı óńirinde jańa stadıon salynyp, eskileri jańartylatyny aıtyldy.