Fýtbol klýbtary memleketten 31,8 mlrd teńge alǵan – Depýtat qarjyny bapkerler jalaqysyna bólýdi usyndy
ASTANA. KAZINFORM – 2024 jyly Qazaqstandaǵy 13 fýtbol klýbyn qarjylandyrýǵa 27,3 mlrd teńge jumsalǵan. Al bıyl jyl basynan beri qazynadan 31,8 mlrd teńge berilgen. Májilis depýtaty Nartaı Sársenǵalıev fýtbol klýbtaryn jedel jekeshelendirýdi jáne bul qarajatty jattyqtyrýshylar jalaqysyn ulǵaıtýǵa baǵyttaýdy usyndy.
– Memleket basshysy Joldaýynda: «Fýtbol klýbtaryn jekeshelendirýge qatysty jumysty tezdetý kerek. Mundaı qadamsyz Qazaqstanda fýtbol damymaıtynyn álemdik tájirıbeden kórip otyrmyz», dedi. Rasynda qazaqstandyq fýtbol klýbtary qaqpaǵa gol salýdan góri, qazynaǵa qol salýdy jaqsy meńgergen. Al biz olardyń bıýdjetke talasqandaı jasyl alańda dopqa talasqanyn qalaımyz. Sebebi qazirgi nátıjeleri qaryn ashyrady. Álemdegi beldi dop dodasyna joldama alǵan jalǵyz klýb qalǵandaryna qorǵan bola almaıdy, – dedi depýtat Májilistiń jalpy otyrysynda.
Onyń aıtýynsha, 2024 jyly Qazaqstandaǵy 13 fýtbol klýbyn qarjylandyrýǵa 27,3 mlrd teńge jumsalǵan.
– Bıýdjet tapshy bop jatqanda fýtbolǵa aqsha taba qalatyn óńir basshylarynyń sheshimin shynymen túsinbeımiz. Bıyl da aıaqdop aıamaı asapty. Mysaly, 2025 jyly Premer-lıgada dop tebetin «Ordabasy» fýtbol klýbyna 3,2 mıllıard teńge bólingen. «Aqtóbe» fýtbol klýbyna 2,1 mıllıard teńge, «Qyzyl-Jar» klýbyna 2 mıllıard teńge berilgen. Jalpy Premer-Lıgada oınaıtyn fýtbol klýbynyń bári bıýdjetten aqsha alady. Al «Astana» fýtbol klýby «Samuryq-Qazynadan» 2025 jylǵa 5,3 mıllıard teńge alǵan, – deıdi N. Sársenǵalıev.
Birinshi Lıgadaǵy fýtbol klýbtaryna da bıýdjetten qyrýar aqsha beriledi, aldy jylyna 1,2 mıllıard teńgeden alǵan.
Jalpy 2025 jyly Premer-Lıga fýtbol klýbtaryna 24 mıllıard teńge, Birinshi Lıgadaǵy fýtbol klýbtaryna 7,7 mıllıard teńge berilgen.
– Sáıkesinshe Qazaqstannyń qambasynan 2025 jyly fýtbolǵa 31 mlrd 799 mln 143 myń teńge jumsaldy dep resmı aıtýǵa bolady. Fýtbol klýbtaryn jekege bersek, keminde osynsha qarajatty únemdep, ony muqtaj salaǵa salýǵa bolady. Onyń biri sport salasyndaǵy jattyqtyrýshylardyń jaǵdaıy. 2025 jyly eńbek jolyn endi bastaǵan jattyqtyrýshy 117 myń teńge alsa, joǵary sanatty jattyqtyrýshy 145 115 teńgege kún kórýge májbúr. Osylaısha buqaralyq sporttyń damýyna tikeleı áser etetin mamandar aılyǵyn shaılyǵyna jetkize almaı, pushaıman hálde júr. Saldarynan sport salasyndaǵy jattyqtyrýshylar jappaı bilim salasyna ketýde, sebebi ol jaqta jalaqy joǵary, – dedi ol.
Májilis depýtaty eldegi barlyq fýtbol klýbyn jedel jekeshelendirýdi jáne búginge deıin alǵan qarajatyna tekserý júrgizýdi usyndy.
– Úkimettiń buıryǵyna ózgeris engizip, dene shynyqtyrý-sport uıymdaryndaǵy jattyqtyrýshylardyń jalaqysyn kóterý qajet, – deıdi depýtat.
Buǵan deıin Májilis depýtaty Sergeı Ponomarev 62 mlrd teńge shyǵyndy qajet etetin halyqaralyq «Bolashaq oıyndaryn» keıinge qaldyrýdy usynǵan edi.
«Qazaqstan Respýblıkasynyń keıbir zańnamalyq aktilerine arhıv isi máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.