Fýtbol: kezekti týrda «Aqjaıyq» Almatynyń «Qaıratyn» qabyldaıdy

Match «Aqjaıyq» fýtbol klýbynyń stadıonynda ótedi. Bıylǵy birinshiliktegi kósh bastaýshy komandalardyń biri «Aqjaıyq» úshin sońǵy oıyndar sátti bola qoıǵan joq. Aldymen toǵyzynshy týrda Shymkentte Dáýrenbek Tájimbetovtiń qos doby «Ordabasyǵa» jeńis ákelse, onynshy týrda Qaraǵandyda «Shahtermen» ótken oıynda Jambyl Kókeev dál osyndaı nátıjege qol jetkizdi. Bul oıynda «Aqjaıyqtaǵy» belarýs legıoneri Igor Zenkovıch 3-mınýtta bıylǵy maýsymdaǵy besinshi dobyn soǵyp, esep ashqanymen, matchtyń qalǵan bóliginde «Shahter» aıqyn basymdylyq kórsetip, 3:1 esebimen jeńiske jetti.

Onynshy týrdan keıin Qostanaıdyń «Tobyly» 23 upaımen qara úzip shyqsa, odan keıingi «Shahter», «Aqjaıyq» jáne «Tarazdyń» qorjyndarynda 19-dan upaılary bar.

16 mamyr kúni Aqtaýda jergilikti «Kaspıımen» Qazaqstan kýbogi úshin synǵa túsetin «Aqjaıyqqa» aldaǵy jeksenbide týrnır kestesinde 9-orynda kele jatqan Dmıtrıı Ogaıdyń shákirtterin qalaıda utýy kerek. Áıtpese jaǵdaıy qıyndap ketedi. Óıtkeni birinshi aınalymnyń qalǵan eki kezdesýi «Aqjaıyqqa» ońaı soqpaıdy. 27 mamyr kúni oraldyqtar Pavlodarda myqty komandalardyń biri «Ertispen» kúsh synassa, 16 maýsym kúni Aq Jaıyq fýtbolynyń túlegi Nurbol Jumasqalıev bastaǵan «Tobyl» oıynshylaryn qabyldaıdy.