Fýtbol: Keılor Navas «Realǵa» aýysty
ASTANA. QazAqparat - Brazılııa mýndıalinde kózge túsken kostarıkalyq qaqpashy Keılor Navas kelesi maýsymnan bastap madrıdtik «Real» klýbynda oınaıdy.
Marca habarlaǵanyndaı, «Real» atalǵan qaqpashy úshin «Levante» klýbyna 10 mln. eýro bergen.
Bunyń aldynda BAQ betterinde Keılor Navas «Bavarııaǵa» aýysatyny jóninde habarlar taraǵan bolatyn. «Realdyń» qazirgi qaqpashysy Dıego Lopes komandadan ketetin boldy. Oǵan «Monako» men «Napolı» qyzyǵýshylyq tanytyp otyr. Al Iker Kasılıastyń komandadaǵy orny myzǵymaıdy.
Keılor Navas álem chempıonatynda ótkizgen 5 matchta tek 2 gol ótkizgen jáne mýndıaldiń eń úzdik qaqpashysy ataǵyna úmitti bolatyn. Degenmen, syılyq sońynda «Bavarııa» qaqpashysy Manýel Noıerge buıyrdy.
