Fýtbol: Qazaqstannyń jastar quramasy ýkraınalyq qurdastaryna utylyp qaldy
ASTANA. Qyrkúıektiń 6-sy. QazAqparat /Ernur Aqanbaı/ - Osy kúnderi fýtboldan Qazaqstannyń jastar quramasy Mınskide oqý-jattyǵý jıynyn ótkizýde. Qazaqstan fýtbol federatsııasynyń málimetinshe, sonyń aıasynda bizdiń komanda qyrkúıektiń 4-i kúni ýkraınalyq qurdastarymen joldastyq kezdesý ótkizip, 1:4 esebimen jeńilip qaldy.
Jerlesterimizdiń tarapynan matchtyń 43-shi mınýtynda Lısenkov dop saldy. Al, qarsylastarymyz bolsa bizdiń qaqpaǵa tórt dopty oıynnyń 35, 57, 82 jáne 90-shy mınýttarynda soqqan.
Aıta keteıik, fýtboldan 21 jasqa deıingi Qazaqstannyń jastar quramasy 2009/2010 jylǵy maýsymda 2011 jylǵy Eýropa chempıonatynyń irikteý týrnıri aıasyndaǵy jarysyn aıaqtady. Bizdiń komanda, irikteý týrnıri barysynda Izraıl, Shvetsııa, Bolgarııa jáne Chernogorııa quramalarymen birge 6-shy topta óner kórsetti. Toptyq kezdesýdegi segiz oıynnyń ekeýinde teń túsip, bireýinde jeńiske jetip, beseýinde jeńilip qalǵan jerlesterimiz 5 upaımen ázirge óz tobynda tórtinshi orynda keledi jáne tıisinshe, olar pleı-off kezeńine shyǵa almady. Ázirge deıtin sebebimiz, bul toptaǵy jarys erteń, qyrkúıektiń 7-si kúni aıaqtalady. Qazaqstan komandasynan 1 upaı qalyp kele jatqan jáne tıisinshe, týrnır kestesiniń sońǵy orynynda turǵan Bolgarııa quramasy erteń óz alańynda Shvetsııamen oınaıdy. Sol oıynnyń qorytyndysy nátıjesinde bizdiń quramanyń óz tobynda neshinshi oryn alatyn belgili bolady.
Іrikteý týrnırine barlyǵy 52 komanda qatysýda. Danııa chempıonatty uıymdastyratyn el bolǵandyqtan, birden fınalǵa jiberildi. Qalǵan komandalar on topqa bólindi. 2009 jylǵy naýryzdyń 28-de bastalǵan, 2010 jylǵy qyrkúıektiń 7-de aıaqtalatyn irikteý týrnırinde toptardyń árqaısynda eki aınalymnan turatyn oıyndar ótedi. Іrikteý týrnıriniń qorytyndysy boıynsha ár toptyń jeńimpazy jáne nátıjeleri úzdik ekinshi oryn alǵan tórt komanda pleı-offqa ótip, jeti jupty qurady. Bul kezeńde sátti oınaǵan jeti juptyń jeńimpazdary Danııadaǵy fınaldyq týrnırge joldama alady.
