FÝTBOL: Qazaqstannyń estrada juldyzdary dańqty sportshylar komandasynan jeńilip qaldy
ASTANA. QazAqparat - Jeksenbi kúni Astana qalasy «Astana-Arena» stadıonynda tuńǵysh ret estrada ánshileri men sport juldyzdary arasynda fýtboldan jarys ótti. Týymyzdy álemdik básekelerde bıikten kórsetken sportshylardan quralǵan «Uly Dala batyrlary» komandasy Qazaqstan estradasynyń ánshileri atynan óner kórsetken «Alataý» fýtbol komandasyn 3-1 esebimen jeńdi, dep habarlady baistars.kz.
«Alataý» fýtbol komandasynda eldiń súıikti ónerpazdary: «MýzART», «Araı», «Nur-Muqasan», «RinGO», «Mysterions» toptary jáne Jubanysh Jeksenuly, Táýekel Músilim, Nurjan Kermenbaev, Mels Saǵat, Ǵadilbek Janaı bolsa, sportshylarymyzdyń atynan «Uly Dala batyrlary» komandasynyń sapynda: Dáýlet Turlyhanov, Ermahan Ibraımov, Islam Baıramýkov, Shalqar Jolamanov, Serik Sápıev, Beıbit Ystybaev, Aıbek Nuǵymarov, Ulan Rysqul, Muhıt Tursynov sııaqty sportshylar jarysty. Aıta keteıik, joldastyq kezdesýdi Qazaqstan Respýblıkasynyń Mádenıet jáne Sport mınıstrligi, Astana qalasy ákimdigi jáne «Nur Otan» partııasynyń qoldaýymen «ALASH-Production» agenttigi uıymdastyrdy.
